தூயாவின்ட சமையல் கட்டு

சீனிச்சம்பல் பண்

2011-08-16T13:24:00.003+09:30

தேவையான பொருட்கள்:

கோதுமை மா

பால்

நீர்

ஈஸ்ட்

சீனி

உப்பு

முட்டை வெள்ளைக்கரு

சீனிச்சம்பல்

செய்முறை:

1. தேவையான பொருட்களை சரி அளவில் அளந்து எடுத்து வைத்துக்கொள்ளுங்கள்.

2. கையை நன்றாக கழுவி விடுங்கள்.கிகிகிகி

3. பாலை லேசாக சூடாக்கி, முறையே சீனி, ஈஸ்ட் போட்டு நன்றாக கலக்கி ஒரு பக்கத்தில் வையுங்கள்.

4. மாவின் நடுவில் சின்னதா ஒரு குளத்தை வெட்டி, அதற்குள் மேற் கூறிய பொருட்களை அனைத்தையும் போட்டு நன்றாக அடித்து (நாங்க எங்க போனாலும் அடி தடி தான்) குழைத்து வையுங்கள். குழைத்த மா இருமடங்காகி வரும் வரை வைத்திருங்கள். நீங்கள் இருக்கும் நாடு, காலநிலையை பொருத்து தான் எத்தனை மணி நேரம் என்று சொல்ல முடியும்.

உதாரணம்: அவுஸ்திரேலியாவில் குளிர்காலம் எனில் குறைந்தது 3 மணித்தியாலங்களாவது தேவைப்படுது.

5. மாவை சிறு சிறு உருண்டைகளாக உருட்டி ஒரு தட்டில் வையுங்கள். தட்டிலும் உருண்டைகள் மேலும் ஒலிவ் எண்ணெய் லேசாக தடவி விடுங்கள்.

6. ஒரு உருண்டையை எடுத்து லேசாக தட்டி, அதற்குள் சீனிச்சம்பலை வைத்து மூட வேண்டும். இது ஒன்றும் பெரிய மந்திரம் கிடையாது. நாங்கள் மோதகம் செய்யும் முறையே தான். இப்படியே அனைத்து உருண்டைகளுக்கும் செய்யுங்கள். ஒட்டும் பக்கத்தை தான் தட்டில் பார்க்க வைக்க வேண்டும்.

7. முட்டை வெள்ளைக்கருவை அடித்து லேசாக மேல் பக்கம் பூசுங்கள். அப்போ தான் பொன்னிறமாக வரும்.

8. ஒவனை முன்னரெ 190°C இல் வெப்பமாக்கி கொள்ளுங்கள். உருண்டைகள் தயார் ஆனதும், ஒரு பேக்கின் தட்டில் வைத்து உள்ளே வையுங்கள்.

9. 18 நிமிடத்தில் சரியாக வந்துவிடும். அதன் பின்னர் வெளியே எடுத்து ஆறிய பின்னர் உண்ணலாம். அல்லது என்னைப்போல் மற்றவர்களுக்கு குடுத்து மிரட்டலாம்.

10. நன்றி . வணக்கம். வந்திட்டோம்ல!! (பத்தாவது பொயின்ற் இல்லாமல் போட்டுது. எதையாவது எழுத வேண்டுமே.)

குறிப்பு:

1. மா குழைக்க அப்பா, அண்ணா போன்ற உதவிக்கரங்களை நாடுவது நமக்கு நல்லது.

2. சீனிச்சம்பலுக்கு பதில், உருளைக்கிழங்கு கறி, முட்டை கறி போன்றவற்றையும் வைக்கலாம்.

3. சீனிச்சம்பல் செய்முறைக்கு: http://thooyaskitche...og-post_19.html

எங்க வீட்டு தக்காளியும், பக்கத்து வீட்டு கருவாடும்

2011-02-22T13:57:00.005+10:30

வணக்கம்,

நலம் தானே? இத்தனை நாள் நிம்மதியா இருந்தமே, இப்போ எதுக்கு இந்த பக்கம் என்று தானே கேட்கிறிங்க? எல்லாம் நம்ம சஞ்சய்க்காக தான். பின்ன நண்பனுக்கு இதை கூட செய்யலைன்னா எப்படி?

இந்த பதிவின் மூலம் நான் சொல்லிக்க விரும்புவது என்ன என்றால்: மைக்ரோவேவில் சமைக்கிறேன் என டிமிக்கி குடுத்து கொண்டிருந்த சஞ்சய் போன ஞாயிறில் இருந்து முழு நேர சமையல்காரன் ஆகிவிட்டார். நண்பனுக்கு உதவும் விதமாக ஏதோ நம்மாலான சில பல உதவிகளை செய்து சஞ்சயை ஒரு பெரிய சமையல்காரன் என உலகமே புகழவைக்க வேண்டும்.

தலைப்பை பார்த்து விட்டு, இதென்ன பெரிய சமையல் என நினைச்சிங்க என்றால் அது தப்பு, பெரிய தப்பு. தேவையான பொருட்களில் தான் இந்த கறியின் சுவை உள்ளது. முதலில் அதைப் பார்ப்போம்.

மிக முக்கியமான தேவையான பொருட்கள்:

(1) அடம் பிடித்து, அப்பாவிடம் திட்டு வாங்கி வீட்டில் நீங்களே வைத்த தக்காளி செடியில் இருந்து வந்த தக்காளிக்காய்கள். (குறிப்பாக அந்த செடிக்கு நீங்கள் ஒரு தடவை கூட நீர் ஊற்றியிருக்க கூடாது. வைத்த சில நாட்களிலேயே வேலை என சொல்லி வேறு ஊரிற்கோ/ நாட்டிற்கோ சென்றுவிட வேண்டும்)

(2) பக்கத்து வீட்டில் கொடுத்த கருவாட்டு துண்டு (கருவாடு தரும் பக்கத்து வீட்டுக்காரரா என பொறாமை வேண்டாம்..அந்த பக்கத்து வீடு என் அண்ணன் வீடு) கருவாடு நிச்சயமாக ஊரில் இருந்து வந்திருக்க வேண்டும்.

வழமையான தேவையான பொருட்கள்:
* தக்காளிப்பழம் 1
* வெங்காயம் பெரியது 1
* உள்ளி 5 நீளவாக்கில் வெட்டியது
* கறிவேப்பிலை 10 இலைகள்
* மஞ்சள் தூள் 1/2 தே.க
* மல்லி தூள் 1/2 மே.க
* மிளகாய் தூள் 1/2 மே.க
* நீர் 1/2 கப்
* தேங்காய்ப்பால் / சோயாப்பால் 1/4 கப்
* உப்பு தேவைக்கேற்ப
* எண்ணெய் சிறிதளவு

செய்முறை:
1. சின்ன தக்காளி காய்களை பாதியாக வெட்டி எடுத்துக் கொள்ளுங்கள். Background Sound: அம்மா "இனி இங்க ஆராவது மரம் வைக்கிறன் அது இது என்று சொல்லட்டும்"

2. வெங்காயத்தை நீளவாக்கில் நறுக்கி எடுத்துக் கொள்ளுங்கள். அது போல தங்காளி பழங்களை சிறு துண்டுகளாக வெட்டி எடுத்துக் கொள்ளுங்கள்.

3. அடுப்பை பற்ற வைத்து, சட்டியை அதில் வைத்து, சிறிது எண்ணெய் ஊற்றி லேசாக சூடாக்க வேண்டும்.

4. சூடாக்கிய எண்ணெய்யில் வெங்காயத்தை போட்டு வதக்குங்கள், பின்னர் உள்ளி (வெள்ளைப்பூண்டு), கறிவேப்பிலை, வெட்டிய தக்காளிகாய்கள், கருவாடு போட்டு நன்றாக வதக்குங்கள்.

5. 3 நிமிடங்களில் மஞ்சள் தூளில் ஆரம்பித்து, மேற் கூறிய அத்தனை தூள்களையும் உப்பையும் சேர்த்து நன்றாக கிளறி 1/2 பேணி(கப்) நீர் சேர்த்து 3 நிமிடங்களுக்கு அவிய விடுங்கள். சட்டிக்கு மூடி மூடி என்று சொல்லி ஒன்று இருக்கும். அதை இப்போதாவது உபயோகிக்கலாமே. அதனால் மூடியால் மூடி அவியுங்கள்.

6. இப்போது பால் (தேங்காய்ப்பால் சுவைதான், கொழுப்பை குறைக்க விரும்புவோர் சோயாப்பால் சேர்க்கலாம்) சேர்த்து நன்றாக கொதித்து வந்ததும் இறக்கிவிடுங்கள். (அடுப்பில் இருந்து தான்)

7. கறி நிச்சயமாக சுவையாக இருக்கும், தக்காளி செடி வைத்ததற்கும், தண்ணீர் ஊற்றாமல் வேறு ஊருக்கு சென்றதற்கும் பேசியவர்களுக்கும் சாப்பிட குடுத்து சமாதானம் செய்துவிடுங்கள்.

பி.கு:
* செய்முறை 3: சஞ்சய் போன்ற புது சமையல்காரர்களுக்காக. கிகிகிகி.. சஞ்சய் யூ கட் த கருவாடு. ஓகே? ;)
* எனக்கு வாழ்த்து சொல்லவே மாட்டாளா என சஞ்சய் நினைக்கலாம், இந்த பதிவ விடவா ஒரு வாழ்த்து ;) கிகிகிகிகி நண்பேன்டா

சரி நான் கிளம்பட்டா, இந்த தடவை என்ன செடி வைக்கலாம்னு யோசிக்கணும்ல ;)

மீன் கட்லட்

2010-10-22T14:32:00.002+10:30

தேவையான பொருட்கள்:

அவித்த மீன் அல்லது மக்கரேல் டின் மீன் 1
வேக வைத்து மசித்த உருளை கிழங்கு 400 கிராம்
சிறிதாக வெட்டிய வெங்காயம் 1 கப்
சிறிதாக வெட்டிய பச்சை மிளகாய் 2 மே.க
சிறிதாக வெட்டிய கறிவேப்பிலை 2 மே.க
மிளகு தூள் 2 தே.க
பெரிய சீரகம் 1 தே.க
பாண்தூள் Bread Crumbs
முட்டை 2
பொரிப்பதற்கு தேவையான எண்ணெய்
உப்பு தேவைக்கேற்ப

முன்னரே தயார்படுத்தி கொள்ள வேண்டியவை:
1. முட்டையை உடைத்து, ஒரு பாத்திரத்தில் இட்டு நன்றாக அடித்து கொள்ளுங்கள்.
2. பாண் தூளை ஒரு பாத்திரத்தில் போட்டு வைத்துக் கொள்ளுங்கள்.
3. பொரிப்பதற்கு தேவையான எண்ணெயை ஒரு பாத்திரத்தில் ஊற்று வையுங்கள்.

செய்முறை:
1. ஒரு சட்டியில் சிறிதளவு எண்ணெய் ஊற்றி லேசாக சூடாக்கி பெரும் சீரகத்தை போடுங்கள்.
2. அத்துடன் மீன், மிளகுத்தூள்,கறிவேப்பிலை, மிளகாய், வெங்காயம் & உப்பு சேர்த்து நன்றாக கிளறி எடுங்கள். அதிக நேரம் அடுப்பில் வைத்திருக்க வேண்டிய அவசியம் இல்லை. 3-5 நிமிடங்கள் போதுமானது.
3. சூடு சற்று ஆறியதும் உருண்டைகளாக பிடித்து கொள்ளுங்கள்.
4. முட்டையில் தோய்த்து எடுத்து பின்னர் பாண் தூளில் போட்டு பிரட்டி எடுங்கள்.
5. பொரிப்பதற்கு எண்ணெயை சூடாக்கி கட்லெட்டை போட்டு பொன்னிறமாகும் வரை பொரித்து எடுங்கள்.
6. சூட்டோட்டு சாப்பிட்டு வாயை புண்ணாக்காமல் ஓரளவு சூடு ஆறியதும் சாப்பிடுங்கள்.

பிகு:
1.கட்லட்டை செய்து பொரிக்காமல் குளிர்சாதனப்பெட்டியில் 2 நாட்களுக்கு வைக்கலாம்.
2. டின் மீன் போடாமல் உடனே வாங்கிய மீனை அவித்து போட்டால் சுவை அதிகமாக இருக்கும்.
3. மிளகுத்தூள் உடனடியாக தூளாக்கி போட்டால் சுவை வித்தியாசமாக இருக்கும்.
4. மிளகுத்தூளுக்கு பதிலாக தேவைக்கேற்ப மிளகாய்தூளும், சிறிதளவு மஞ்சள் தூளும் சேர்க்கலாம்.

பாவக்காய் பாக்கறி

2010-10-09T17:40:00.004+10:30

என் தொல்லை இல்லாமல் இருந்த சமையல்கட்டிற்கு (உங்களுக்கும்)மறுபடியும் கெட்ட காலம். என்ன பண்ண? நவராத்திரி விரத காலமாயிற்றே, சமையல்கட்டிற்கு வராமல் இருக்க முடியுமா? விரதகாலம், சைவ சாப்பாடு. நேற்று வைத்த பாவக்காய் பாக்கறி உங்களுக்காக.

பாக்கறி = பால்+கறி

தேவையான பொருட்கள்:
பாவக்காய் 1
வெங்காயம் 1/2 பெரியது
மிளகாய் 1
தக்காளி 1/2 பெரியது
கறிவேப்பிலை 10 இலைகள்
தேங்காய் பால் 3 தே.க
மஞ்சள்தூள் 1/2 தே.க
பெரும் சீரகம் 1 தே.க
உப்பு தேவைக்கேற்ப

செய்முறை:
1. பாவக்காயை சுத்தம் செய்து உங்களுக்கு வேண்டிய அளவில் & வடிவத்தில் வெட்டி எடுங்கள். கசப்பை சகிப்பது கடினம் எனில் சிறிய துண்டுகளாக இருப்பது நல்லது.
2. வெங்காயம், மிளகாய், தக்காளியை பொடியாக வெட்டிக்கொள்ளுங்கள்.
3. ஒரு சட்டியில் 1/2 கோப்பை நீரை ஊற்றி அடுப்பை பற்ற வையுங்கள். (அடுப்பை மட்டும் தான், தம்மை அல்ல)
4. வெட்டிய பாவக்காய், வெங்காயம், மிளகாய், கறிவேப்பிலை; மற்றும் பெரும் சீரகம், மஞ்சள்தூள், உப்பு சேர்த்து வேக வையுங்கள்.
5. பாவக்காய் பாதி வெந்ததும், தக்காளியை சேருங்கள்.
6. பாவக்காய் வெந்ததும், பாலை சேர்த்து கொதி நிலை வந்ததும் அடுப்பை அணைத்துவிடுங்கள்.
7. அம்புட்டு தான் மக்கா, கசப்பா இருந்தாலும் சகிச்சிட்டு சாப்பிட பாருங்க. உடல்நலத்திற்கு ரொம்பவே நல்லதுன்னு நல்லவங்க, பெரியவங்க சொல்றாங்க.

குறிப்புகள்:
* தேங்காய் உடைக்கும் போது அதில் வரும் நீரை எடுத்து பாவக்காயை வேக வைத்தால் கசப்பு குறையும்.
* வேக வைக்கும் போது சிறிதளவு சீனி(சக்கரை) சேர்த்தாலும் கசப்பு குறையும்.

ஒரு கொடியை தூக்க தூக்க ஓராயிரம் பாவக்காய்.. பாவக்காயை பற்றிய வரலாறு, சமூகக்கல்வி ஆகியவற்றை அறிய விரும்பின்: CLICK

மீன் பொரியல்

2010-03-20T13:11:00.004+10:30

அசைவ உணவுப்பிரியர்கள் பலருக்கு மிகவும் பிடித்த ஒரு உணவு என்றால் அது மீன் பொரியல் என சொல்லலாமா? என்ன தான் சுவையாக கறி வைத்தாலும், அதோடு சாப்பிட மீன் பொரியல் இல்லை என்றால் கொஞ்சம் கஸ்டம் தான். அதுவும் படகிலேயே போய் மீனை பிடித்து பொரித்தால்?! யம்ம்ம்ம்ம்ம்ம்ம்.. இத்தனை அருமை பெருமைகளை தனக்குள் அடக்கிய மீன் பொரியலை செய்வதொன்றும் பெரிய வேலை கிடையாது. மிகவும் எளிதான செய்முறை தான்.

தேவையானவை:
உங்களுக்கு பிடித்த மீன் 5 துண்டுகள்
(சின்ன மீன் என்றால் 5 மீன்கள்)
மிளகாய் தூள் 1 தே.க
மஞ்சள் தூள் 1/2 தே.க
மல்லி தூள் 1/2 தே.க
கரைத்த புளி 1 தே.க
உப்பு தேவைக்கேற்ப
பொரிக்க எந்த எண்ணெய் பயனடுத்துவீர்களே, அது கொஞ்சம்

செய்முறை:
1. ஒரு பத்திரத்தில் எண்ணெயை விட்டு சூடாக்கி கொள்ளுங்கள். மீனை சுத்தம் செய்து மேற்கூறிய தூள்கள், புளி, உப்பு சேர்த்து நன்றாக பிரட்டி எடுத்து வைத்து கொள்ளுங்கள்.மிதமான சூடு வந்ததும் மீன் துண்டுகளை போட்டு பொரிய விடுங்கள்.
2. மீன் ஒரு பக்கம் பொரிந்து வந்ததும் அடுத்த பக்கம் திருப்பி பொரிய விடுங்கள்.
3. இரண்டு பக்கமும் பொரிந்ததும், மீனை எடுத்து எண்ணெயை வார விட்ட பின்னர் பரிமாறுங்கள்.

* மீன் பொரிக்கும் போது கொஞ்ச வெங்காயத்தையும், பச்சை மிளகாயையும் நீள வாக்கில் பொரித்து எடுத்தாலும் நல்ல சுவையாக இருக்கும் என நான் சொல்லியா நீங்க தெரிஞ்சுக்கணும்!
* இன்று நான் சமைத்ததை உலகிற்கு சொல்ல வேண்டும் என்றால் மீன் பொரியலுக்கும் செய்முறை போடுவது தப்பில்லை!

சக்கரை பொங்கலோடு தைத்திருநாள் வாழ்த்துகள்

2010-01-14T18:52:00.004+10:30

உறவுகள் அனைவருக்கும் இனிய தைதிருநாள் வாழ்த்துகள். மறக்காமல் கொஞ்சம் சக்கரை பொங்கலையும் சாப்பிட்டுவிட்டு செல்லுங்கள்..

இலகு சக்கரை பொங்கல் செய்முறை...2007 இல் பதிவிட்ட செய்முறை..ஆனால் பொங்கல் இன்று செய்தது தான். நம்பி சாப்பிடலாம்..கிகிகி

தேவையான பொருட்கள்:
அரிசி = 1 பேணி
வறுத்த பாசி பயறு = 1/3 பேணி
சர்க்கரை = 1 பேணி
தேங்காய் பால் = இ பேணி
நீர் = 3 பேணி
Cashewnuts = 2 மே.க
Raisins = 2 மே.க

செய்முறை:
1. பொங்கல் பானையில் நீரை விட்டு கொதிக்க விடவும். நீர் கொதித்து வரும் போது அதில் பாலை சேர்க்கவும்.

2. பால் பொங்கியதும், ஏற்கனவே சுத்தப்படுத்தி, நீரில் கழுவிய அரிசியை போடவும். அரிசி அரை பதத்திற்கு வெந்ததும் அதில் சர்க்கரையை சேர்க்கவும். [சர்க்கரையை நீரிலோ பாலிலொ கரைத்துவிடுவது நல்லது] பாலும், சர்க்கரையும் சேர்ந்த பின்னர் அடுப்பின் வெப்பத்தை குறைக்கவும். பொங்கல் சட்டியில் ஒட்டி எரிவதற்கான சாத்தியங்கள் அதிகம். ஆகவே அடிக்கடி அகப்பையால் கிளறிவிடவும்.

3. அரிசி நன்றாக வெந்ததும், அதில் நெய்யையும் Cashewnuts & Raisins யும் சேர்த்து கிளறி அடுப்பின் இருந்து இறக்கவும்.

சுவையான சர்க்கரை பொங்கல் ஆயத்தம். சாமிக்கு படைக்காமல் சாப்பிட்டால் பாவம் கிடைக்கும்!

நத்தார் & புத்தாண்டு வாழ்த்துகள்

2009-12-28T22:19:00.003+10:30

அனைவரும் நலம் தானே? நலமா இருக்கணும்னு எங்க குலச்சாமி கருப்புசாமி கிட்ட வேண்டிக்கிறேன். ;)

என்னோட மத்த வலைப்பூ காணாமல் போனதை எனக்கு தெரிவித்த நட்புள்ளங்களுக்கு நன்றிகள். திருப்பி எடுக்க கேட்டிருக்கேன். பக்அப் பண்ணி தான் வச்சிருக்கேன். அவங்க தந்ததும் அதை போட்டுடலாம். அந்த வலைப்பூவின் டெம்ப்ளேட் எனக்கு சிந்தாஸ் (சிந்தாநதி) உருவாக்கி தந்தது. அதை மாற்ற எனக்கு இஸ்டம் இல்லை.

உங்களுடைய பதிவுகளும் படிக்கவில்லை. இனி அது தான் வேலை....

நத்தார் தினத்தின் போது வாழ்த்துகள் தெரிவிக்க முடியவில்லை. இப்போ அனைவருக்கும் என்னோட வாழ்த்தை தெரிவிச்சிக்கிறேன். விரைவில் பிறக்கும் புத்தாண்டு வாழ்த்துகளும் அனைவருக்கும்...

Merry Xmas & Happy New Year

வெண்டிக்காய் பால்கறி

2009-10-29T23:54:00.005+10:30

போன பதிவில் மீன் செய்முறை. சைவபிரியர்களுக்காக இந்த தடவை ஒரு இலகுவான சைவ செய்முறை. தைரியம சமைச்சு பார்த்திட்டு சொல்லுங்க.

தேவையான பொருட்கள்:

வெண்டிக்காய் 12
தக்காளி 1
பெரிய வெங்காயம் 1/2
கறிவேப்பிலை 10 இலைகள்
வெந்தயம் 1 தே.க
பெரும் சீரகம் 1/2 தே.க
மஞ்சள் தூள் 1/2 தே.க
தேங்காய் பால் 1 மே.க
உப்பு - உங்க இஸ்டம்

செய்முறை:
1. வெண்டிக்காயை சுத்தம் செய்து, சிறிய வட்டங்களாக வெட்டிக் கொள்(ல்)ளுங்கள். நீளமா வெட்டினா கூட தப்பில்லை.அது உங்க இஸ்டம்.

2. தக்காளியை சிறிய துண்டுகளாக அறுத்து கொள்ளுங்கள். அது போல வெங்காயத்தை நீள வாக்கில் அரிந்த்து எடுங்கள்.

3. ஒரு பாத்திரத்தில் மேற் கூறிய பொருட்களில் பாலை தவிர அனைத்தையும் ஒரு சட்டியில் போடுங்கள். அதில் 1/4 கப் நீர் சேர்த்து கொதிக்கவிடுங்கள்.(மறக்காமல் தீ உள்ள அடுப்பில் வையுங்க மக்கா..அப்புறம் இங்கண வந்து கேள்வி கேட்காதிங்க)

4. வெண்டிக்காய் விரைவில் அவிந்துவிடும். பாதி அவிந்ததும், அதில் பாலை சேர்த்து கிளறி 2 நிமிடத்தில் அடுப்பில் இருந்து இறக்கிவிடுங்கள். அதிகம் அவிந்தால் உண்பதற்கு சுவையாக இருக்காது.

மிகவும் சுலபமான, சுவையான, உடல்நலத்திற்கு நல்ல உணவு ஆயத்தம்! நல்லா சாப்பிட்டு நல்லா வாழுங்கப்பா...

பி.கு: இந்த சைவ செய்முறையை அசைவமாக மாற்ற மிகவும் சுலபமான வழி உள்ளது. இறால் கருவாடு அல்லது மீன் கருவாட்டு துண்டுகளை சேருங்கள். சுவை ஆளை தூக்கும். (இல்லைன்னாலும் சமையல் தூக்கிடும்ல) கிகிகிகி

டின் மீன் கறி

2009-09-28T09:56:00.005+09:30

ஹிம்ம்ம் இந்த பாழாபோன வேலையால என்னோட சமையற்கட்டை விட்டு பிரிந்து வெளிநாடுகளுக்கு செல்ல வேண்டிய நிலை. கடைகளில் சாப்பிடுவதற்கு சாப்பிடாமல் இருக்கலாம் போல ஒரு வாரத்திலேயே தோன்றிவிட்டது. சரி நாம தான் சமையலில் ஒரு கரை கண்டவங்களாச்சேன்னு என்னோட ஹொட்டேல் சூட்லயே சமைக்க ஆரம்பிச்சாச்சு. அதனால என்ன சொல்றேன்னா....என்கிட்ட இருந்து தப்பிக்க முடியாது. அடிக்கடி இனிமேல் திடீர் சமையலோடு வருவோம்ல...

போனவாரம் சமைச்சது, மீன்கறி பழசுன்னாதான் ருசி. மறக்காம சாப்பிட்டு போங்க.கிகிகிகி

தேவையானவை:

டின் மீன் 1
வெங்காயம் 1
பச்சை மிளகாய் 3
தக்காளி 2
உள்ளி/வெள்ளை பூண்டு 4
கறிவேப்பிலை 15 இலைகள்

மிளகாய் தூள் 2 மே.க
மல்லி தூள் 1 மே.க
மஞ்சள் தூள் 1/2 தே.க
சின்ன சீரகம் 1/2 தே.க
கடுகு 1/2 தே.க
எண்ணெய் சிறிதளவு
நீர் 1 கோப்பை
உப்பு தேவையான அளவு

செய்முறை:

1. முதல்ல டின் மீனை வலை போட்டு ஒரு கடையில இருந்து பிடிச்சிட்டு வரணும்.

2. வெங்காயத்தை தோலுரிச்சு, நீளமாக வெட்டி எடுக்கணும். அதோட மிளகாயையும் நான்காக நீளவாக்கில் வெட்டி எடுக்கணும்.

3. இப்போ மீதி இருக்கிற தக்காளியை வெட்டணும்னு நான் சொல்லுவேன்னு எதிர்பாக்கிறிங்களா? அப்படின்னா நீங்க இன்னமும் சமையலில் ஒரு அப்பிராணி, இல்லைன்னா நீங்க சமையல்ல ஒரு புலி.[கவனம்:வலையில் புலி எதிர்ப்பாளர்கள் அதிகம்]

- தக்காளியை சிறிய துண்டுகளாக அரிந்து கொள்ளுங்கள்.

4. உள்ளியை தோல் உரித்து, விழுதாக அரைத்து எடுங்க. இதோட ஆயத்த வேலைகள் முடிந்தது. இனி:

5. அடுப்பை பற்ற வைத்து, அதில் ஒரு சட்டியை வைத்து, அதில் சிறிதளவு எண்ணெய் ஊற்றி சூடாக்குங்க.

6. கடுகை முதலில் போட்டு வெடிக்க விடவும். பின்னர் முறையே சீரகம்,அரைத்த உள்ளி, வெங்காயம், மிளகாய், கறிவேப்பிலை, தக்காளி போட்டு நன்றாக வதக்குங்க. நன்றாக வதங்கி வரும் போது சட்டியில் இருக்கும் கலவை அரைத்த விழுது போல வந்திருக்கும்.

7. இந்த கலவையோடு முதலில் மீன் துண்டுகளை சேர்த்து 5 நிமிடத்திற்கு அவிய விடுங்க.
பின்னர் தூள்களையும் உப்பையும் நீரையும் சேர்த்து 10 நிமிடங்களுக்கு கொதிக்க விடுங்க.

அப்புறம் என்ன? அம்புட்டு தான். கறிய 4 பேருக்கு சாப்பிட குடுத்தமா, அவங்கள கொன்னமா என இருங்க. நாம சமையல் பழகனும்னா 4 பேர போட்டு தள்ளின குற்றம் இல்லையாக்கும்.கிகிகிகிகி

சமையல்கட்டில் இருந்து ஒரு எச்சரிக்கை

2009-09-20T00:16:00.001+09:30

சமையல்கட்டில் எழுதி பல வாரங்களாகிவிட்டது. இப்போ தான் நிம்மதியா இருக்கோம் என சிலர் ஆனந்தப்பட்டதாக அறிய முடிந்தது. அது எப்படி ஆனந்தமாக இருக்கலாம்? தூயா என்றாலே ஒரு பயம் இருக்க வேண்டாமா? அது தான் இந்த பதிவு. இதை ஒரு எச்சரிக்கை பதிவாக எடுத்து கொள்ளுங்கள் (சிலர்). உங்களை இன்னமும் பயமுறுத்தும் நல்லெண்ணம் இருந்ததால் இன்னும் பல சமையல் செய்முறை புத்தகங்களை வாங்கியுள்ளேன். வாங்கிய சில புத்தகங்கள் கீழு உள்ள படத்தில் உள்ளது. (வாங்கப்போன இடத்தில்) அதனால் என்ன சொல்கின்றேன் என்றால் நாங்க இடையிலே சில நாட்கள் காணாமல் போனால் அது பயந்தல்ல, பின்னர் பாய்வதற்கே பாய்வதற்கே என அடித்து சொல்கின்றோம்..கிகிகிகி

வாழ்த்துகள் வாழ்த்துகள் வாழ்த்துகள்

2009-07-07T12:48:00.002+09:30

இயற்கை,
இனிய பிறந்தநாள் நல்வாழ்த்துக்கள். பதிவெழுதி வாழ்த்திய இயற்கைக்கும், பின்னோட்டத்தில் வாழ்த்திய அனைத்து உறவுகளுக்கும் என் நன்றிகள்.
அன்புடன்,
தூயா

மற்றவை

2009-04-23T14:55:00.002+09:30

1. Veg Fry

குளிர் உணவு

2009-04-23T14:51:00.001+09:30

1. தேங்காய் சோர்பற்

வீட்டு சமையல்

2009-04-23T14:50:00.002+09:30

1. கங்கூன் கீரை வறை
2. Prawn & Corn Hot Rice
3. Tofu பகோடா
4. லெபனீஸ் ப்ரட் & டூனா ரப்

சலட்

2009-04-23T14:45:00.004+09:30

1. வெள்ளரிக்காய் சலட்
2. வெங்காய சம்பல்

சொதி/ரசம்

2009-04-23T14:39:00.002+09:30

சைவம்:
1. மிளகு ரசம்
2. தூதுவளை ரசம்

அசைவம்:
1. மீன் சொதி

ஈழம் இனிப்பு பலகாரங்கள்

2009-04-23T09:43:00.003+09:30

1. அவல்
2. கேசரி
3. கச்சான் அல்வா
4. எள்ளுருண்டை
5. சக்கர பொங்கல்

ஈழம் - கார பலகாரங்கள்

2009-04-23T09:39:00.002+09:30

1. உழுந்து வடை
2. போண்டா

பொரியல்

2009-04-23T09:37:00.002+09:30

சைவம்:
1. உழுந்து வடை

அசைவம்:
1. மீன் பொரியல்

சீன சமையல் செய்முறைகள்

2009-04-23T09:34:00.006+09:30

1. கங்கூன் கீரை
2. Cashew Chicken

ஈழம் -- அசைவ கறிகள்

2009-04-23T09:34:00.004+09:30

1. நண்டு கறி

ஈழம் - சைவ கறிகள்

2009-04-23T09:33:00.002+09:30

கீரை சமையல்:
1. முளைக்கீரை மசியல்
2. பொன்ணாங்காணி வறை
3. வல்லாரை சம்பல்

காய்கறிகள்:
1. பாகற்காய் சம்பல்
2. தங்க பூசணிக்காய்
3. கரட் சம்பல்

தானியங்கள்:
1. பருப்பு கறி

சூப் செய்முறைகள்

2009-04-23T09:26:00.001+09:30

1. Hot Soup
2. Creamy Cauliflower Soup

இந்திய சமையல் செய்முறைகள்

2009-04-23T09:19:00.004+09:30

இனிப்புகள்:
1. ரசமலாய்
2. டயமண்ட் பர்பி

சைவம்:
1. வெங்காய பகோடா
2. பாகற்காய் தொக்கு
3. நிலக்கடலை சுண்டல்
4. ரவா பொங்கல்
5. எண்ணெய் கத்தரிக்காய்

அசைவம்:
1. Succulent Chicken Legs
2. ஆற்றுக்கொழுத்தி மீன் குழம்பு
3. மிளகு கோழி குழம்பு

மலே சமையல் செய்முறைகள்

2009-04-23T09:14:00.002+09:30

1. மிளகாய் நண்டு
2. நசி லமக்
3. முட்டை சம்பல்
4. உடாங் சம்பல்

இலங்கை சமையல் செய்முறைகள்

2009-04-23T09:07:00.004+09:30

1. சீனிச்சம்பல்
2. லவரியா
3. மாலு பாண்
4. வினிகர் கத்தரிக்காய்

தேநீர்/குளம்பி

2009-04-22T15:34:00.003+09:30

1. பால் தேத்தண்ணி
2. மைக்ரோவேவ் தேத்தண்ணி
3. மைக்ரோவேவ் குளம்பி

கஞ்சி

2009-04-22T15:16:00.000+09:30

1. பால்கஞ்சி

மீன் சமையல் செய்முறைகள்

2009-04-22T15:01:00.007+09:30

1. மாலுபாண்
2. மீன் வறுவல்
3. மீன் சொதி
4. கேரள மீன் குழம்பு
5. மீன் வறுவல்
6.மீன் கட்லட்

சம்பல்

2009-04-22T15:01:00.002+09:30

1. இடிச்ச சம்பல்
2. கரட் சம்பல்

ரொட்டி

2009-04-22T14:56:00.002+09:30

1. கிழங்கு ரொட்டி

பழச்சாறு

2009-04-21T21:20:00.001+09:30

1. விளாம்பழ ஜூஸ்
2. மாம்பழ ஜூஸ்
3. பலூடா

இனிப்பு வகை

2009-04-21T20:52:00.002+09:30

1. எள்ளு உருண்டை
2. லவரியா
3. மஸ்கட்
4. ரசமலாய்
5. டயமன்ற் பர்பி
6. கேசரி
7. கச்சான் அல்வா
8. சக்கரை பொங்கல்

நண்டு சமையல் செய்முறைகள்

2009-04-21T17:51:00.003+09:30

1. நண்டு கறி
2. மிளகாய் நண்டு

முட்டை சமையல் செய்முறைகள்

2009-04-21T17:38:00.008+09:30

1. 50:50 முட்டை பொரியல்
2. முட்டை அவிப்பது எப்படி
3. முட்டை பிட்ஸா
4. முட்டை சம்பல்

கோழி சமையல் செய்முறைகள்

2009-04-21T17:36:00.004+09:30

1. Succulent Chicken Legs
2. முந்திரி & கோழி வறுவல்
3. சிக்கன் பிரியாணி
4. மிளகுகோழி குழம்பு

சில காய்கறிகளின் பயணக்கட்டுரை (படங்கள்)

2009-04-21T15:17:00.004+09:30

இவை இங்கு எங்கள் வீட்டு தோட்டத்தில் நான் வளர்த்தவை...ஆனால் இவங்கட ஜீனும் ஈழம், என்னைப்போலவே...

:)

பி.கு: கட்டுரை எங்கன்னு தேடாதிங்க..அது இங்க இல்லை..கிகிகிகி

குசும்பனின் குதூகலம் தொடரட்டும்

2009-04-16T07:53:00.004+09:30

குசும்பா, உன் வாய்க்கொழுப்பை எல்லாம் வண்டியிலேயே விட்டு விட்டு வீட்டிற்குள் நுழைந்து இப்படி கையைக் கட்டி நடித்தே ஒரு வருடம் கடந்துவிட்டாய். இந்த ஓராண்டை விட இன்னும் அதிக மகிழ்ச்சியுடனும் ஆரோக்கியத்துடனும் நீ இன்னும் நூறாண்டுகள் கடக்க எங்கள் இதயம் கனிந்த நல்வாழ்த்துக்கள். குசும்பனுக்கும் சகோதரி மஞ்சுவிற்கும் இனிய திருமணநாள் நல்வாழ்த்துக்கள்...!

இனிப்புடன் வாழ்த்துகள் கூறுவது.........தங்கை தூயா

[சிறப்பு பதிவு போட வேண்டும் என நினைத்திருந்தேன்...அந்த நிலையில் இப்போது இல்லாததால்...சஞ்சய் மற்றும் என் சகோதரர்களின் உதவியுடன் இந்த பதிவை போடுகின்றேன்.]

பப்புட அம்மா & விளாம்பழம்

2009-04-07T12:46:00.004+09:30

இன்று பப்புவின் அம்மாவிற்கு பிறந்த தினம். கேக் குடுத்து வாழ்த்தலாம் என்றால் சகோதரர் ஆயில்ஸ் முந்திவிட்டார். பிறந்த நாளாயிற்றே, இனிப்பாக ஏதும் தரலாம் என நினைத்ததன் பலன்:

விளாம்பழ ஜூஸ்

தேவையானவை:
விளாம்பழம் 1
தேங்காய் பால் 1/2 கப்
சீனி 1/2 கப்
உப்பு 1/4 தே.க

செய்முறை:
1. விளாம்பழத்தின் ஓட்டை உடைத்து, உள்ளே இருக்கும் பழத்தை எடுத்து கொள்ளுங்கள்.
2. பால், சீனி & உப்பு சேர்த்து மிக்ஸியில் நன்றாக அடித்து எடுங்கள். (தேவையான அளவு நீர் சேருங்கள். இப்போதே ஐஸ் கட்டிகளையும் போட்டு அடிக்கலாம்)
3. குவளையில் ஜூஸை ஊற்றி, ஐஸ் கட்டிகளை போட்டு பரிமாறுங்கள்.

ஒஸ்திரேலியாவில் இதுவரை நான் விளாம்பழத்தை மருந்துக்கு கூட (!) கண்டதில்லை. யாராவது இங்கு விளாம்பழம் கண்டுள்ளீர்களா? நீங்க நீங்க வசிக்கும் நாட்டில் விளாம்பழம் இருந்தால் ஜூஸ் செய்து குடியுங்கள்...

இனிய பிறந்த நாள் நல்வாழ்த்துகள் சந்தனமுல்லை

இன்று பரிசோதனையில்: கிழங்கு ரொட்டி

2009-04-03T15:31:00.003+10:30

வெள்ளிகிழமை என்றாலே எங்க வீட்டில் சிலருக்கு கவலை! பின்னே இன்று அசைவம் கிடைக்காதே. அதனாலேயே வெள்ளிகிழமைகளில் வித்தியாசமாக எதையாவது சமைப்பதுண்டு. இன்று காலையிலேயே கிழங்கு ரொட்டி செய்வது என நினைத்ததை செயல்படுத்தியது கீழே:

ரொட்டி

தேவையானவை:
கோதுமை மா (Plain Flour) - 1 கோப்பை
பட்டர் 1 மே.க
உப்பு தேவைக்கேற்ப

செய்முறை:
1. மா,பட்டர்,உப்புடன் நீர் சேர்த்து நன்றாக குழைத்து எடுங்கள்.
(சாதாரண ரொட்டியின் பதம்)
2. குழைத்த மாவை சில மணித்தியாலங்கள் வையுங்கள்.
(மாலையில் செய்வதென்றால் காலையில் குழையுங்கள்)
3. மாவை சிறு உருண்டைகளாக உருட்டி எடுத்து கொள்ளுங்கள்.

அப்படியே நில்லுங்க, கறியை ஆயத்தம் செய்வோம்...

கறி

தேவையானவை:
உருளை கிழங்கு 2
வெங்காயம் 1
செத்தல் மிளகாய் 2
சீரகம் 1 தே.க
கடுகு 1/2 தே.க
மஞ்சள் தூள் 1/2 தே.க
மிளகாய் தூள் 1 மே.க
கறிவேப்பிலை 10 இலைகள்
உப்பு தேவையான அளவு
தேசிக்காய் புளி உங்கள் சுவைக்கேற்ப

செய்முறை:
1. உருளை கிழங்கு, வெங்காயத்தை தோலுரித்து வெட்டி கொள்ளுங்கள்.
2. ஒரு சட்டியில் சிறிதளவு எண்ணெய் விட்டு, சூடாக்கி கடுகு, சீரகம், கறிவேப்பிலை, வெங்காயம் ஆகியவற்றை முறையே வதக்குங்கள்.
3. வதக்கிய கலவையில் உருளைகிழங்கு, தூள்கள், உப்பு சேர்த்து 1 பேணி நீர் சேர்த்து அவிய விடுங்கள்.
4. கிழங்கு அவிந்து, நீர் வற்றி வந்ததும் அடுப்பில் இருந்து இறக்கி தேசிக்காய் புளி சேர்த்தால் கறி ஆயத்தம் ஆகிவிடும்.

இனி,

மாவை மெல்லிதாக உருட்டி, ஒரு தேவையான அளவு கறியை வைத்து சுற்றுங்கள்.(பெட்டி வடிவம்).
தேசைக்கல்லை சூடாக்கி, ரொட்டியை போட்டு 6 பக்கமும் பொன்னிறமாகும் வரை சுட்டு எடுங்கள்.

தொட்டுக்க:
சட்னி வகைகள்
தக்காளி சோஸ்

அம்புட்டுதான்!

இந்த வார தமிழ்மண நட்சத்திரமாம் எங்க சரவணாண்ணாவுக்காக இந்த பதிவு :)

இவற்றிற்கான ஆங்கில பெயர்கள் தெரியுமா?

2009-04-03T08:57:00.003+10:30

சில பல செய்முறைகளை செய்து பார்க்க முயன்ற போது இச்சொற்கள் எனக்கு புரியவில்லை. இவற்றின் ஆங்கில பெயர்கள் என்ன? தெரிந்தவர்கள் பகிர்ந்து கொள்ளுங்கள்..நன்றி

பரங்கிகாய்
பீர்கங்காய்
சேப்பகிழங்கு
நார்த்தங்காய்
முள்ளங்கி
சேனைகிழங்கு
காராமணி
சக்கரைவள்ளி கிழங்கு
சம்பா கோதுமை மா
கோதுமை மா
கொள்ளு
மைதா மா
மொச்சை
சோம்பு

50:50 முட்டை & சோயா பொரியல்

2009-03-31T07:58:00.006+10:30

'ஆகா பார்ப்பதற்கு எறி குண்டு போல இருக்கே, எடுத்து எறியலாமா' என நினைக்கும் உங்கள் மனதிற்கு ஒரு கடிவாளம் இடுங்கள். [என் சமையல்கட்டிற்கு வந்தாலே உங்களில் சிலருக்கு இப்படியெல்லாம் தோன்றுமே!] ஆனால் இதன் சுவை அறிந்தால் எறியமாட்டீர்கள்...எறிந்தாலும் பிடித்து கொள்பவர் அதிஸ்டசாலி

பொதுவாக நாம் முட்டை பாதிக்கு உருளைகிழங்கோடு சேர்த்த மீன்/இறைச்சி/காய்கறி கறி ஒன்றை வைத்து மறுபாதியாக்குவதுண்டு. [இது சமைக்கிறவைக்கு மட்டும் தான் தெரியும். என்ன ஏது என கேட்காமல் கணக்கே இல்லாமல் சாப்பிடுறவங்களுக்கு புரிவது கடினம் தான்.கிகிகி] உருளைக்கிழங்கை தவிர்க்கலாமே என நினைத்து சோயாவில் மட்டும் செய்து பார்த்தேன். நன்றாகத்தான் வந்தது. என்ன, சோயாகலவைக்கு கொஞ்சம் காரம் அதிகமாக இருக்க வேண்டும்.

தேவையானவை:
முட்டை 11
Bread Crumbs 1 கோப்பை
எண்ணெய் - பொரிக்க

சோயாகறிக்கு:
சோயா 1 கோப்பை
வெங்காயம் 1
பச்சை மிளகாய் 2
மிளகாய் தூள் 1 மே.க
மஞ்சள் தூள் 1/4 மே.க
கடுகு 1/2 தே.க
பெரும் சீரகம் 1/2 தே.க
கறிவேப்பிலை 2 மே.க
உப்பு தேவையான அளவு

செய்முறை:
1. 10 முட்டைகளை வேக வைத்து, ஓடை உடைத்து, பாதியாக வெட்டி கொள்ளுங்கள்.
2. சோயா கறிக்கு:
அ) சோயாவை கொதிநீரில் 5 நிமிடங்களுக்கு ஊறவிட்டு, நீரை வடித்து எடுத்து கொள்ளுங்கள்.
ஆ) வெங்காயம், மிளகாயை சிறிதாக அரிந்து கொள்ளுங்கள்.
இ) ஒரு சட்டியில் சிறிதளவு எண்ணெய் சேர்த்து சூடு ஏறும் போது கடுகு, சீரகம், வெங்காயம், மிளகாய், கறிவேப்பிலை, உப்பு, தூள்களை முறையே சேர்த்து நன்றாக வதக்குங்கள். வெங்காயம் நன்றாக வதங்கியதும் அதில் சோயாவை சேர்த்து நன்றாக கிளறி விடுங்கள்.
3. பாதி முட்டைக்கு எலுமிச்சை பழம் அளவு உருண்டை கறியை எடுத்து முட்டையின் மறுபாதி ஆக்குங்கள்.
4. உருட்டிய உருண்டையகளை அடித்த முட்டையில் போட்டு எடுத்து, பின்னர் ப்ரட் க்ரம்ஸில் உருட்டி எடுங்கள்.
5. அளவான சூடு கொண்ட எண்ணெயில் பொரித்து எடுங்கள்.

ஜோடி: தக்காளி சோஸ்

கவனிக்க வேண்டியவை:

1. காரத்தை கூட்டி குறைக்கலாம்.
2. அவித்த முட்டையின் மஞ்சள் பகுதியை எடுத்து சோயா கறி கிளறும் போது சேர்த்து கிளறலாம்.
3. சோயா தனியேவா என நினைப்பவர்கள் ஒரு கரட்டை சீவி சேர்த்து கொள்ளுங்கள்.
4. 50:50 என பெயர் சூட்டிய பெருமை என்னை மட்டுமே சேரும்.

இது என்ன?

2009-03-30T22:49:00.001+10:30

கண்டுபிடி கண்டுபிடி வறை

2009-03-26T08:39:00.005+10:30

கண்டுபிடி கண்டுபிடியில் இருந்து கழண்டு கொண்டவர்கள் தான் அதிகம். பதிவுக்கு வந்த பதில்களை பார்க்கும் போது பலர் சமையல்கட்டு பக்கம் போவதே இல்லை என தெரிகின்றது. ஆனால் பேசியே சமைச்சிடுவினம்.கிகிகி

சரியாக பதில் சொன்னது வி.ஜே.சந்திரன் அவர்கள் மட்டுமே. அவரது பதில் "HEAJBDCGIF

I guess B=D"

நீங்கள் குறிப்பிட்டது போல B=D. நான் பெரும் சீரகத்தை செத்தலுக்கு அடுத்து போட்டேன். நீங்க மஞ்சளுக்கு அடுத்து போட்டுள்ளீர்கள். அதுவும் சரி என்பதால் உங்களுக்கு "சமையல் மேதை" எனும் பட்டம் வழங்கப்படுகின்றது.

[பதில் சொல்லாமல் எனக்கே பட்டத்தை விட்டு தந்தவர்களுக்கு நன்றிப்பா...நன்றி]

தண்ணீரிலே கங்கூன் கீரை பதிவில் சொன்னது போல, கீரையில் இலையை மட்டும் தான் உண்ண வேண்டும் என சட்டம் ஒன்றும் கிடையாதே. [இருந்தாலும் அதையெல்லாம் நாம கடைப்பிடிக்கவா போறோம்] அதனால் சத்துள்ள அந்த தண்டை வைத்து என்ன செய்யலாம் என பார்ப்போம்.

கீரை தண்டு வறை

தேவையானவை:
கங்கூன் கீரை தண்டுகள்
அரைத்த செத்தல் 1 தே.க
கடுகு ½ தே.க
மஞ்சள் தூள் ½ தே.க
எண்ணெய் 1 தே.க
உப்பு தேவைக்கேற்ப

செய்முறை:
1. கீரை தண்டுகளை சிறிதாக வெட்டி எடுங்கள். நீரில் சுத்தம் செய்து கொள்ளுங்கள்.
2. ஒரு சட்டியில் வெட்டிய கீரை தண்டுகளை போட்டு 1 மே.க நீர் சேர்த்து அவிய விடுங்கள்.
3. நீர் வற்றும் போது எண்ணெய், செத்தல் தூள், உப்பு, மஞ்சள் தூள், கடுகு சேர்த்து வறுங்கள். [2 நிமிடங்கள்]
4. உப்பு சரி பார்த்து அடுப்பில் இருந்து இறக்கினால் சுவையான கீரை தண்டு வறை ஆயத்தம்.

பி.கு:
மிகவும் சுவையான இந்த வறையும் வெறுமே சோறுடனே சாப்பிடலாம்.

நண்டு நறு நறுக்க..

2009-03-24T20:17:00.002+10:30

இப்போ என்னோட சமையல் வரலாறை [வல்லாரைன்னு எழுதிட்டேன்] எடுத்து கொண்டால் இன மொழி சாதி மத வேறுபாடு அற்று செய்முறைகள் அமைந்திருக்கும். அதில் குறிப்பாக கடலுணவை எடுத்து கொண்டால், எந்த நாட்டு செய்முறை என்றாலும் சமைப்பதுண்டு. பார்க்க நன்றாக இருந்து, சுவையும் நல்லாயிருக்கும் என காதுவழி கதைகள் வந்தால் சமைப்பதுண்டு. ஆனால் மீனை/நண்டை/இறாலை வெட்டுவதோ, சுத்தம் பண்ணுவதோ என் வேலையில்லை. அதுக்கு ஒரு காரணம் இருக்கு......ஒரு சின்ன ப்ளாஸ்பக்

டொய்ங்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்க்

"சித்தப்பா நண்டு dead ஆ?"
" அது செத்து 4 நாள் ஆச்சு தூயா"
"உண்மையாவோ? நான் தொட்டு பார்க்கட்டா?"
"ஓ அதுக்கென்ன"
"ஆஆஆஆஆஆஆஆஆஆஆஆஆஆஆஆஆஆஆஆ" பின்ன உயிரோட இருக்கிற நண்டு தொடும் போது பூவா பறிச்சிட்டு இருக்கும்?

அன்று தொடக்கம் இன்று வரை எனக்கும் நண்டுக்கும் ஒத்துவராது...நாங்க எதிரும் புதிரும்..அது தான் எதிரின்னு ஆகிடிச்சில்ல, அதனால நண்டோட நான் கோபம்.

ஆக வீட்டில் வெட்டி, சுத்தம் செய்த நண்டை தான் நான் அகப்பையாலே சமைப்பதுண்டு. பின்ன, தொட்டால் ஒட்டிக்கும்ல. கோவம்னா கோவம் தான். அதனாலோ என்னமோ நண்டில் இருக்கும் அத்தனை செய்முறைகளையும் சோதித்து, நண்டையும், உண்பவர்களையும் சோதிப்பதுண்டு.

இனி உங்களுக்கான சோதனை:

தேவையானவை:
நண்டு 1
முருங்கை இலை 1 பேணி
வெங்காயம் 1
பச்சை மிளகாய் 3
மிளகாய் தூள் 2 மே.க
மஞ்சள் தூள் 1/2 தே.க
பெரும்சீரகம் 2 தே.க
மல்லி தூள் 1/2 மே.க
தேங்காய் பால் 1/2 பேணி
கறுவா துண்டு 1
அரைத்த உள்ளி 4

செய்முறை:
1. நண்டை வெட்டி, சுத்தம் செய்து எடுங்கள். [கோவம்னா, வீட்டில யாராயாச்சும் வெட்ட சொல்லுங்க]
2. ஒரு சட்டியில் சிறிதளவு எண்ணெய் சேர்த்து வெங்காயம், மிளகாய், உள்ளியை பச்சை வாசம் போகும் வரை வதக்குங்கள்.
3. இன்னொரு சட்டியில் சீரகம்,கறுவா வாசம் வரும் வரை வறுத்தெடுங்கள்.
4. மேற்கூறிய இரண்டையும் நண்டோடும், முருங்கை இலையையும் ஒன்று சேர்த்து சிறிதளவு நீரில் அவியுங்கள். நீர் கொதிக்க ஆரம்பித்ததும் தூள்களையும், உப்பையும் மறக்காமல் சேருங்கள்.
5. நண்டு அவிந்ததும் [சிவப்பாகும்], தேங்காய் பாலை ஊற்றி கொதிக்க வைத்து இறக்குங்கள்.

குறிப்பு:
1. கறிவேப்பிலை சேர்க்கலாம்.
2. நண்டு சூடாம், அதனால் தான் முருங்கை இலையாம். Cool down படத்தில் முருங்கை இலையை தேடாதிங்க. [நான் போடலையாக்கும்]
3. தேங்காய் பாலை தவிர்த்து பசும்பால்/ சோய் பால் சேர்க்கலாம்.
4. உறைப்பு அதிகம் வேணும் என்றால் மிளகாய்தூளை அதிகமாக்குங்க.
5. நண்டு விரும்பிகளுக்கு:

The average blue crab contains about 2 ounces (57g) of meat, depending on its size. On average, meat yield is 14% of whole crab weight.

Crab meat is an excellent source of high quality protein, vitamins, and minerals that are needed for good nutrition. Crab meat is an excellent source of phosphorus, zinc, copper, calcium, and iron and is very low in fat, especially saturated fat. For a complete nutritional analysis, click here.

Crab meat is also somewhat high in cholesterol which can also raise your blood cholesterol level. Most major health organizations, such as the American Heart Association, recommend a daily limit of 300mg. It is important to note that saturated fatty acids are the chief culprit in raising blood cholesterol levels and that crab meat is very low in fat, and especially low in saturated fat. Consult your doctor or dietitian if you are on a very restricted diet.

http://www.bluecrab.info/nutrition.htm

என்னுடைய முதல் கேக்

2009-03-23T15:45:00.005+10:30

Long long ago, so long ago என்னோட சமையல் வாழ்க்கை ஆரம்பித்தது. பழைய புகைப்படங்களை பார்க்கும் போது மாட்டியது:

ரொம்ப சின்ன வயதில் [4 1/2 வயது]அன்னையர் தினத்திற்காக அப்பாவின் மேற்பார்வையில் நான் செய்த கேக் ஐஸிங். ஐஸிங் கலக்க உதவியது பெரியண்ணா, அதில் பாதியை சாப்பிட்டது சின்னண்ணா, இறுதியில் ஐஸிங் கலந்த கோப்பையை உடைத்தது குட்டியண்ணா. கேக்கில் இதயம் செய்யலாம் என ஆலோசனை தந்தது பெரியண்ணா, இதயம் போல மணிகள் வைக்கும் போது கேக்கை உடைத்து, பின்னர் கட்டு போட்டோமாம். உண்மையில் எனக்கு இத்தனை ஞாபக சக்தி இல்லை,தகவல் உபயம்: பெரியம்மா

வரலாறு ஒன்று ஆரம்பித்த கதை இது தானாக்கும்.

லவரியா நீ வாறியா?

2009-03-20T13:49:00.005+10:30

சென்ற பதிவில் சொன்னது போல வறை செய்முறையை எழுத முடியவில்லை. காரணம் இன்னும் சிலநாட்கள் வரை நேரம் தரளாமே எனும் எண்ணம் தான். 'எங்களுக்கு சாப்பிட மட்டும் தான் தெரியும்..இதெல்லாம் தெரியாது' என சொல்பவர்களின் எண்ணிக்கை தான் அதிகமாக உள்ளது. நியாயமாங்க? சமையல் 4 Dummies என ஒரு தொடர்பதிவை போடலாம் போல! வறை வறுக்க தாமதமாவதால் இன்று கொஞ்சம் லவரியாவ வாறியான்னு கேட்டு பார்க்கலாம்.

தேவையானவை:

இடியப்பத்திற்கு:
இடியப்ப மா [சிவப்பு/வெள்ளை]
உப்பு
கொதிநீர்

பூரணத்திற்கு:
பாசிப்பயறு 1 கோப்பை
தேங்காய் பூ 1/2 கோப்பை
சீனி 1/2 கோப்பை
சக்கரை 1/4 கோப்பை
ஏலக்காய் பொடி 1/2 தே.க

செய்முறை:
1. பயறை அவித்து எடுத்து, நீர் வாற விட்டு ஒரு பாத்திரத்தில் போடுங்கள். அதில் சீனி,சக்கரை,ஏலக்காய்,தேங்காய்பூ சேர்த்து நன்றாக கலக்கி எடுத்து கொள்ளுங்கள்.
2. தேவையான அளவு அரிசிமாவுக்கு தேவையான அளவு உப்பு சேர்த்து கொதிநீர் சேர்த்து குழைத்து எடுங்கள். [இடியப்பம் குழைக்கும் பதம் = சட்டியில் ஒட்டாமல் இருக்க வேண்டும்]
3. இடியப்ப உரலில் மாவை போட்டு பிழியுங்கள். பிழிந்த இடியப்பத்தின் மேல் பூரணத்தில் 1 மே.க வைத்து பாதியாக மடித்து கொள்ளுங்கள்.
4. இடியப்பம் அவிக்கும் பாத்திரத்தில் நீராவியில் வேகவைத்தெடுங்கள்.
5. இப்போ லவரியா வந்தாச்சு.

பி.கு:
1. லவரியா ஒரு பெண் என நினைத்து வந்தவங்களுக்கு: better luck next time
2. இடியப்பம் பிழியும் போது கீழே ஒரு கத்தியை வைத்து அதில் பாதி விழுமாறு பிழிந்தால், பூரணம் வைத்த பின்னர் பாதியாக மடிக்க உதவும்.
3. இதுவரை வறையை கண்டுபிடிக்காதவர்கள், கண்டுபிடிக்க "கண்டுபிடி கண்டுபிடி: வறை"

கண்டுபிடி கண்டுபிடி: வறை

2009-03-19T10:08:00.013+10:30

உங்களுக்கும் சமையலுக்கும் எத்தனை பொருத்தம் என பார்ப்பதே இந்த பதிவின் நோக்கம். கீழேயிருக்கும் Quiz கு சரியான பதில் சொன்னால் "சமையல் மேதை" எனும் பட்டம் வழங்கப்படும்.

சென்ற பதிவில் குறிப்பிட்டது போல, கங்கூன் கீரை தடல் வறை செய்யும் போது எடுத்த படங்கள் தான் கீழே உள்ளது. அப்படங்கள் செய்முறையின் படி அல்லாமல், கலந்து போய் உள்ளன. அவற்றை சரியாக சொல்ல வேண்டும். இப்படி செய்வதன் மூலம் செய்முறையை நீங்களே கண்டுபிடிச்சு கொள்ளலாம். எத்தனை நாளைக்கு தான் நானே எழுதுவது; அதனால் தான் இந்த கண்டுபிடிப்பு [சரியா பாருங்க 'கண்டுபிடி' என இரு தடவை வந்தாச்சு, ஆக பதிவின் தலைப்பு நியாயப்படுத்தியாச்சு]

A

B

C

D

E

F

G

H

I

J

அடுத்த பதிவில் சரியான விடையும், யார் யார் சமையல் மேதை ஆனீர்கள் என்பதும் அறிவிக்கப்படும்.

தண்ணீரிலே கங்கூன் கீரை

2009-03-17T17:25:00.007+10:30

எங்க வீட்டில் அனைவரும் விரும்பி உண்ணும் கீரை என்றால் அது கங்கூன் தான். இந்த கீரைக்கு வெறும் உப்பு சேர்த்து அவித்து சாப்பிட்டால் கூட சுவையாக தான் இருக்கும். வீட்டில் அனைவரும் விரும்புவது என்பதால் இந்த கீரையை வைத்து சில பல பரிசோதனைகள் நான் செய்வதுண்டு. அப்படி செய்வதில் சில தடயம் இன்றி அழிக்கப்படும். சில தப்பிதவறி சரியாக வந்துவிடும். ஆனால் என்ன சட்டி, பானையை எரிக்காத வரை எனக்கு சேதமில்லை. அந்த அளவிற்கு போகாமல் பார்த்து கொள்வது தான் ஒரு நல்ல சமையல்காரருக்கு அழகு. நான் சொல்றது சரி தானே?

கீரையை பற்றி அறிந்து கொள்ள விரும்பின் கூகிளில் "Kangkung" என தட்டச்சு செய்து தேடி பாருங்கள். இதை Water Spinach என்றும் அழைப்பார்கள். நீரில்/அல்லது சதுப்பு நிலத்தில் தான் இந்த கீரை வளருமாம்.

கங்கூன் & தக்காளி அவியல்

தேவையானவை:
கங்கூன் – 1 பிடி
தங்காளி – 1
மிளகாய் – 2
வெங்காயம் – ½
உள்ளி – 3
பெரும் சீரகம் – ½ தே.க
உப்பு தேவைக்கேற்ப

செய்முறை:
1. அனைத்தையும் சுத்தம் செய்து, சிறிதாக நறுக்கி எடுங்கள்.
2. ஒரு சட்டியை அடுப்பில் வைத்து, சிறிது நீர் சேர்த்து, அடுப்பை பற்ற வையுங்கள். [இது “சமையல்கட்டு For டம்மீஸ் க்காக]
3. அந்த சட்டியில் ஏற்கனவே நறுக்கி வைத்திருக்கும் அனைத்தையும் போட்டு அவிய விடுங்கள். மறக்காமல் உப்பையும், பெரும் சீரகத்தையும் சேருங்கள்.
4. நன்றாக அவிந்ததும் அடுப்பில் இருந்து இறக்கிவிடுங்கள்.

பி.கு:
கங்கூன் கீரை தண்டை பலர் எறிவதுண்டு. அதில் அதிகம் சத்து உண்டு. அதை வைத்து கூட ஒரு வறை செய்யலாம். அடுத்த பதிவில் வறையோடு வருவோம்ல…

மஸ்கட் இனிப்பு: குடுகுடுப்பை, புதுகை, விக்கி

2009-03-16T14:40:00.004+10:30

என்னடா இது குடுகுடுப்பையார், புதுகைதென்றல், விக்கியெல்லாம் சேர்ந்த்து மஸ்கட் செய்யியனமோ என நினைக்காதிங்க. முதல் இருவரையும் விட்டுவிடலாம், விக்கியெல்லாம் மஸ்கட் செய்தால் நாடு தாங்குமா?! [நான் சமைக்கும் மஸ்கட்டிலேயே வீடு கட்டி வாழ்பவர்கள் கானாபிரபா அண்ணாவும், லக்கியண்ணாவும்]அப்புறம் எதுக்கு இவங்க மூன்று பேரும்? இதுக்கு தான்:

1. புதுகை தென்றலோட ஆக்கம் யுத் விகடனில் வெளியாகி உள்ளது.
2. குடுகுடுப்பையாருக்கு இன்று பிறந்த நாள்
2. விக்கிக்கு இன்று பிறந்த நாளும், அவருடைய ஆக்கமும் விகடனில் வெளியாகியுள்ளது.

இனிப்பு செய்து மூவரையும் வாழ்த்தலாமே என்று ஒரு நல்(?)எண்ணம் தான்.

தேவையானவை:

கோதுமை மா - 1 பேணி
சீனி - 1 3/4 பேணி
கொஞ்சமா நெய் / பட்டர்
cashew nuts
ஓரஞ் நிறம் (Food coloring)

செய்முறை:

1. மாவினை ரொட்டிக்குக் குழைப்பது போல் நன்றாக பதமாக குழைத்தெடுத்து சிறிது சிறிதாக ஒரு பேணி தண்ணீர் விட்டு கலந்து கரைத்து வையுங்கள்.

2. தண்ணீர் மிதந்து மாக்கலவை பாத்திரத்தின் அடியில் பால் போல் படிந்திருக்கும் நிலை வந்தபின் தண்ணீரை ஊற்றி விட்டு அடியிலிருக்கும் மாவினை மட்டும் தனியய பிரித்தெடுத்துக் கொள்ள வேண்டும்.

3. இப்பொழுது பிரிச்ச மாக்கலவையில் orange கலரிங்கை சேர்த்துக் கொள்ளுங்கள்.

4. ஒரு சட்டியில் சீனியை காய்ச்சத் தொடங்குங்கள்.

5. சீனி உருகி வந்த உடனே மாக்கலவையை அதனில் போட்டு கரண்டியினால் கிளற தொடங்குங்கள். கை வலிக்குதே என்று ஒரு நிமிடம் கூட அப்படியே விட்டுவிடாதீர்கள். அப்புறம் வீடென்ன, பெரிய பாலமே கட்டலாம் உங்க மஸ்கட்டில்.
[கலவை சட்டியில் ஒட்டாம இருக்க, அப்பப்போது நெய் அல்லது வெண்ணையை விட்டு பதமாக வரும் வரை கிண்டிக் கொண்டிருங்கள்]

6. சரியான பதத்திற்கு மஸ்கட் வரும் போது சட்டியில் ஒட்டாமல் திரண்டு ஒரு உருளையாகும். அப்போது வெட்டிய cashew nuts சேர்த்து கிளறி ஒரு தட்டில் போட்டு பரவிவிடுங்கள்.

7. சூடு ஆறியபின் துண்டுகளாக வெட்டி எடுத்து பரிமாறவும்.

என்னது? வெள்ளிகிழமைல அசைவமா?

2009-03-13T16:26:00.008+10:30

ஒவ்வொரு சைவ நாளிலும், குறிப்பாக வெள்ளிக்கிழமைகளில் எங்க வீட்டில நடக்கும் பிரச்சனை இது. அண்ணாக்கு அசைவம் வேண்டும். அப்பாக்கு அசைவைத்தை கண்டாலே கோபம் வரும். பிறகென்ன, கதையை நீங்களே கண்டு பிடிச்சிருப்பிங்களே, எங்க தமிழ் சினிமா போல...

எதுக்கு இந்த பிரச்சனை என, முதல் நாளே அண்ணாக்கு அசைவம் சமைத்து வைத்துவிடுவேன். அப்பா இந்த திருட்டுத்தனத்தை காணும் போதெல்லாம் சாப்பிட்ட அண்ணாவோட எனக்கும் தான் திட்டு. திட்டுக்காக அண்ணனை விட்டு குடுக்க முடியுமா?

இப்போதை கதை என்னன்னா, அண்ணி எங்கப்பா பக்கம். அதனால பாவம் அண்ணாக்கு என்னை விட்டா வேற வழியே கிடையாது. இன்று வெள்ளி, நேற்றே அண்ணாக்கா சமைத்தவற்றில் இருந்து உங்களுக்காக ஒன்று..

வெங்காய தடல் & இறால் கருவாட்டு வறை

தேவையானவை:

வெங்காய தடல் – 4 பேணி
இறால் கருவாடு – 1 மே.க
தேங்காய் பூ – 1 மே.க
பெரும் சீரகம் – ½ தே.க
எண்ணெய் – ½ தே.க
உப்பு தேவைக்கேற்ப

செய்முறை:
1.வெங்காய தடலை அரிந்து கொள்ளுங்கள்.
2.இறால் கருவாட்டில் மண் இருக்கும் சாத்தியங்கள் எங்கள் உளவுப்படை மூலம் நிரூபிக்கப்பட்டுள்ளது. அதனால் நீரில் போட்டு கழுவி எடுங்கள்.
3.ஒரு சட்டியில் வெங்காய தடலை போட்டு 2 மே.க நீருடன் சேர்த்து அவிய விடுங்கள்.
4.அவிந்து வந்ததும் இறால், தேங்காய் பூ, பெரும் சீரகம், அரைத்த செத்தல், உப்பு சேர்த்து நன்றாக வறுத்தெடுங்கள்.
5.அம்புட்டு தான்!

குறிப்பு:
வெங்காய தடல் கிடைக்காட்டி, spring onion பாவிச்சுக்கலாம்

விக்கினேஸ்வரன் - பிறந்தநாள் - கேட்ட Tuna Pasta

2009-03-12T11:26:00.001+10:30

16.03.09 இல் தனது பிறந்த நாளை கொண்டாடும் சகோதரர் விக்னேஸ்வரன் அவர்களுக்கு இனிய பிறந்த நாள் வாழ்த்துகள்.

தேவையானவை:
spirals pasta 3 கோப்பை
வெட்டிய குடமிளகாய் 1/4 கோப்பை
நீளமாக அரிந்த வெங்காயம் 1/2 கோப்பை
அரிந்த சிவப்பு மிளகாய் 2
Tuna Fish [Tin] 1/2 கோப்பை
உப்பு தேவைக்கேற்ப

செய்முறை:
1. பாஸ்டாவை நீரை சுட வைத்து, அவித்து எடுங்கள். பாஸ்டாவை கொதி நீரில் போடும் போது தேவையான அளவு உப்பும், 1 தே.க எண்ணெயும் சேருங்கள். நன்றாக அவிந்த பாஸ்டாவை நீர் வடித்து வைத்து கொள்ளுங்கள்.
2. ஒரு சட்டியில் எண்ணெய் சேர்த்து குடமிளகாய், வெங்காயம் மிளகாயை பச்சை வாசம் போகும் வரை வதங்குங்கள்.
3. வதங்கிய வெங்காயம் மிளகாயோடு Tuna மீன் தூள்களை சேர்த்து 2 நிமிடங்களுக்கு கிளறி, அவித்து வைத்திருக்கும் பாஸ்டாவை சேர்த்து கிளறுங்கள். உப்பு சரி பார்த்து கொள்ளுங்கள்.
4. சுட சுட தட்டில் போட்டு, மேலே Cheese சீவி சாப்பிடலாம்.

குறிப்புகள்:
* சீஸை தவிர்க்கலாம்.
* மிளகு தூளும் சேர்க்கலாம்

விக்கி, இனிய பிறந்த நாள் வாழ்த்துகள் & நீங்க கேட்ட பாஸ்டா செய்முறை. சமைத்து பாருங்கள்.

சிபி சமைக்கிறார்: மீன் வறுவல்: வாழ்த்துகள்

2009-03-12T00:26:00.001+10:30

இன்று சகோதரர் சிபியின் திருமண நாள் என்பதை வலையுலகமே அறிந்திருக்கும். சிபியுடன் வாழ்ந்து வரும் சிபி அண்ணி எத்தனை தூரம் நல்லவங்க, அன்பானவங்க, பொறுமையானவங்க என்பதும் உலகமே அறிந்த ஒரு விடயம் தானே!தினமும் சிபிக்காக சமைக்கும் அண்ணிக்காக இன்று சிபி சமைக்க போறாராம். அதுக்காக ஏதோ என்னால முடிந்த உதவி.

தேவையானவை:
குட்டி மீன்
மிளகாய் தூள் 1/2 தே.க
மஞ்சள் தூள் 1/4 தே.க
உப்பு தேவைக்கேற்ப
எண்ணெய் பொரிக்க

செய்முறை:
1. மீனை வெட்டி, சுத்தம் செய்து எடுத்துக்குங்க.
2. வெட்டிய மீனுக்கு மேற்கூறிய தூள்களையும், உப்பையும் போட்டு நன்றாக பிரட்டி கொஞ்ச நேரம் வையுங்க. [அவசரம் என்றால் உடனே பொரிக்கலாம்]
3. எண்ணெயை சூடாக்கி மீன்களை போட்டு பொரித்தெடுங்கள்.[இரண்டு பக்கமும் திருப்பி பொரிக்க வேண்டும்]

சிபி: இதை விட ஒரு திருமண பரிசை என்னால் தர முடியுமா?
தூயா மனதிற்குள்: கடவுளே எப்படியாவது சிபி அண்ணி இந்த பதிவை படிக்கணும்

மாம்பழ கூழ்

2009-03-10T15:41:00.006+10:30

எங்க வீட்டு மாமரத்திற்கு ஒரு விவஸ்தையே இல்லைங்க. பின்ன, கொஞ்சம் கொஞ்சமா காய்த்தால்…அளவோடு சாப்பிடலாம். ஆனால் ஒரே நேரத்தில் நூற்றுக்கணக்கில் பழம் வந்தால் அதை என்ன தான் செய்வது?

மாம்பழ ரைஸ், மாம்பழ குழம்பு, மாங்காய் சொதி, மாம்பழ அல்வா, மாம்பழ ஜூஸ் என அனைத்துவிதமான போர் யுக்திகளையும் கையாண்டாச்சு. அதில ஒன்று தான் இது:

உடனடி மாம்பழ கூழ்

தேவையாவனை:
மாம்பழம் 1
தயிர் 1 மே.க
சீனி 1 மே.க
ஐஸ்கட்டிகள் 4
நீர் ¼ கப்

செய்முறை:
1.மாம்பழத்தை தோல் சீவி,துண்டுகளாக்கி கொள்ளுங்கள்.
2.அனைத்தையும் உங்க மிக்ஸில போடு 1 நிமிடத்துக்கு அடித்து எடுங்கள்.
3.ஒரு குவளையில் விட்டு குடியுங்கள்.

குறிப்பு: எங்க வீட்டில இருக்கிற மாமரத்தை பற்றி வேறு எப்படித்தான் சொல்வது

:P

வெள்ளிக்கிழமை - திருட்டு கீரை - சமையல்

2009-03-06T11:11:00.010+10:30

இந்த பசங்களுக்கு கல்யாணம் பண்ணி குடுத்தாலே கஸ்டம் தாங்க. தெரியாத்தனமா எங்கண்ணாக்கு கல்யாணம் பண்ணி குடுத்திட்டம். இப்ப கஸ்டபடுறம்…பின்ன என்ன….நானே இந்த கீரைக்காக 1 ½ மணித்தியாலம் காரில போய் வாங்கி வந்தேன். என்னோட பல்கலைக்கழக ஆசிரியர் ஒருவரிடம் பெரிய தோட்டம் இருக்கு. ரொம்ப நாளாவே கீரை வளர்க்கணும் என்று ஆசை..ஆசிரியர் கீரை முளைக்க போட விதைகள் தருவதாக சொல்லவும்..உடனே சென்று வாங்கி வந்தேன்.

வந்த உடனே கீரைக்கு பாத்தி கட்டியாச்சு…அடுத்த நாள் போடலாம் என வைச்சிருந்த விதைகளை எனக்கு தெரியாம எடுத்து கொண்டு போய் தன்ட வீட்டில போட்டுட்டார்
அண்ணா... இதில எங்க மாமா வேற "அண்ணா பாவம், கல்யாணம் பண்ணினதும் ஏதோ ஆசை பட்டு கீரையெல்லாம் வைக்கிறார்...சண்டையெல்லாம் போடாதேம்மா" நீங்களோ சொல்லுங்க, கீரை வைக்கிறவர் தான் சொந்தமா வாங்கியெல்லோ வைக்கோணும்!

”அக்க்ர்ர்ர்” என மனசில இருந்தாலும் கீரை முளைத்து வரும் வரை காத்திருந்து இன்று பழிவாங்கிட்டேன்ல. அண்ணாவீட்ட போய் கீரை எடுத்து வந்து கீரைமசியல் செய்தாச்சு. அண்ணாக்கு வேலைக்கு தொலைபேசிய போட்டு “வேலை முடிஞ்சதும் இஞ்ச வந்து சாப்பிடுங்கோ..அண்ணியை நானே போய் கூட்டி வாறேன்” என்றும் சொல்லியாச்சு..அண்ணா வேலைவிட்டு வந்ததும் க்ளைமேக்ஸ் என்ன என்று தெரியும்..கிகிகிகி நாங்க யாரு ;)

சும்மா சொல்லக்கூடாது திருட்டு மாங்காய் போல, திருட்டு கீரையும் சுவைதாங்க..

தேவையானவை:

முளைக்கீரை 1 பிடி [திருடியது என்றால் நல்லது]
வெங்காயம் 4 மே.க
மிளகாய் 2
பெரும் சீரகம் 1/2 தே.க
தேசிக்காய் புளி 1 தே.க
பசும்பால்/தேங்காய்பால் 3 தே.க
உப்பு தேவைக்கேற்ப

செய்முறை:
1. கீரையை சுத்தம் செய்து, நீரில் அலசி, நீர் வார போட்டு, அரிந்தெடுங்கள்.
2. மிளகாயை நான்காக பிளந்து கொள்ளுங்கள்.
3. ஒரு சட்டியில் கீரை,வெங்காயம்,மிளகாய், பெரும் சீரகத்துடன் சிறிதளவு நீர் சேர்த்து அவியுங்ககள்.
4. நன்றாக அவிந்த கீரையை நன்றாக கடைந்தெடுங்கள்.
5. கடைந்த கீரைக்கு பாலும், புளியும் சேர்த்து கலக்கினால் கீரை ஆயத்தமாகிவிடும்.

குறிப்பு:
* கீரை வாய்வு என்பதால், கொஞ்சமா உள்ளி சேர்த்துக்கலாம்.

மின் அனல் அடுப்பில் சோறு சமைக்கலாம்

2009-01-06T15:28:00.011+10:30

என்னடா திடீரென மின் அனல் அடுப்பு [மைக்ரோவேவை] பற்றி எழுதுகின்றேன், மைக்ரோவேவ் செய்முறைகள் வருகின்றதே என நீங்க நினைக்கலாம். (முன்னாடி நினைக்கலை என்றால் கூட இப்போ நினைச்சுக்குங்க எனக்காக). எல்லாம் அன்பு சகோதரர்களுக்காக தான்.

ஜோசப் அண்ணா சமைக்கிறாக
ராம் அண்ணா சமைக்கிறாக
ஆயில்ஸ் சமைக்கிறாக
அதிஷா சமைக்கிறாக
தம்பி சமைக்கிறாக
விக்கி சமைக்கிறாக

[இவங்கள விடயும் சிலர் சமைக்கிறாங்க. வெளியில் சொல்லாதேம்மான்னு கெஞ்சியிருப்பதால் ரகசியம் பாதுகாக்கப்படுகின்றது. கிகிகிகி]

பாவம் என் சகோதரர்கள்..வேலைக்கு போகணும்..சமைச்சு சாப்பிடணும் என கஸ்டபடுகின்றார்கள். வேறு நாட்டில் இருப்பதால் நான் சமைப்பதை கூட குடுக்க முடிவதில்லை. [அதற்கு பயந்து தான் வேறு நாடுகளில் இருக்காங்கண்ணு கானாஸ் சொல்லுவார். நம்பாதிங்க] அதனால் சில மைக்ரோவேவ் சமையல்கள் தெரிந்தால் சகோதரர்கள் பிழைத்து கொள்வார்கள் என்பதால் தான் இந்த மைக்ரோவேவ் தொடர். தவிர முகம் தெரியாத எத்தனையோ சகோதரர்கள் இருப்பார்கள் இல்லையா...அவர்களுக்கும் சேர்த்து தான்.

இந்த பதிவில் அரிசியை எப்படி சோறு ஆக்குவது என பார்ப்போம்:

தேவையான பொருட்கள்:
அரிசி 1 பேணி
நீர் 1 1/2 பேணி [கொஞ்சம் அரிசி பதமாக சோறு இருக்க வேண்டும் எனில் 1 1/4 போதும்]
மைக்ரோவேவ் சேவ் சட்டி (கிளாஸ்/ப்ளாஸ்டிக்) + மூடி

செய்முறை:

1. அரிசியை நீரில் கழுவி சமைக்க உபயோகப்படுத்தும் சட்டியில் போடுங்கள். நீரையும் சேருங்கள். அரிசி பாதி சட்டிக்கு மேல் வந்திருந்தால் வேறு ஒரு சட்டியை உபயோகியுங்கள். காரணம் அரிசி அவிந்து வரும் போது இருக்கும் அளவிலிருந்து இரட்டிப்பாகும். சட்டியில் இடம் போதவில்லை என்றால் கொட்டிவிடும்.

2. High இல் 10 நிமிடங்களுக்கு மைக்ரோவேவ் உள்ளே வைத்து அவியுங்கள். இப்போது சட்டியை மூட வேண்டாம்.

3. வெளியே எடுத்து கிளறிய பின்னர் மூடியால் மூடி 4 நிமிடங்களுக்கு வைத்து எடுங்கள். [சூடாக இருக்கும்.கை, முகம் பத்திரம்]

4. நான்கு நிமிடங்களுக்கு பின்னர் வெளியே எடுத்து, அப்படியே 2-3 நிமிடங்களுக்கு வைத்திருங்கள். பின்னர் மூடியை எடுத்து பாருங்கள் உங்களுடைய மைக்ரோவேவ் சோறு ஆயத்தமாகியிருக்கும்.

குறிப்புகள்:

1. சிறிது உப்பு / பட்டர் / நெய் / வினாகிரி சேர்க்கலாம்.
2. குங்குமப்பூ சேர்த்தால் நிறம் மாறும்.
3. இதற்குள் சிறிது சோளம், பச்சை பட்டாணி சேர்த்து அவித்தாலும் நன்றாக இருக்கும்

பி.கு: சமைத்த சோறு படம் எங்கென்னு தேடாதிங்கக. மேலே நசிலெமக்கிற்காக சமைத்த சோறு இருக்கு. சரியா பாருங்க..கிகிகி

மைக்ரோவேவ் தேத்தண்ணி & குளம்பி

2009-01-06T14:07:00.013+10:30

அடுப்பில் வைத்து நீர் கொதிக்க வைத்து, அடுப்பில் வைத்து பால் கொதிக்க வைத்து போடும் தேநீரின் சுவை வேறு எந்த முறையில் செய்தாலும் வராது என்பது தான் உண்மை. ஆனால் ஆபத்திற்கு பாவம் இல்லை என்பது போல் குறைந்த நேரத்தில் தேநீர் தயாரிக்க உதவுவது மைக்ரோவேவ்.

கறுப்பு தேத்தண்ணி

தேவையான பொருட்கள்:

மைக்ரோவேவ் சேப் குவளை
தேயிலை பை
சீனி

செய்முறை:

1. குவளையில் நீரையும், தேயிலை பையையும் போட்டு 1 நிமிடத்திற்கு வையுங்கள். [2 நிமிடத்தில் அதிகம் கொதித்துவிடும். கொஞ்சம் சூடாக வேண்டும் என்பவர்கள் 1 1/5 நிமிடத்திற்கு வைக்கலாம்]
2. மைக்ரோவேவில் இருந்து கவனமாக எடுங்கள். குவளை சூடாக இருக்கும். கை பத்திரம்.
3. சீனியை உங்களுக்கு தேவையான அளவு போட்டு குடியுங்கள்.

பால் தேத்தண்ணி

தேவையான பொருட்கள்:

மைக்ரோவேவ் சேப் குவளை 2
தேயிலை பை
சீனி
பால்

செய்முறை:

1. குவளையில் நீரையும், தேயிலை பையையும் போட்டு 1 நிமிடத்திற்கு வையுங்கள். [2 நிமிடத்தில் அதிகம் கொதித்துவிடும். கொஞ்சம் சூடாக வேண்டும் என்பவர்கள் 1 1/5 நிமிடத்திற்கு வைக்கலாம்]
2. மைக்ரோவேவில் இருந்து கவனமாக எடுங்கள். குவளை சூடாக இருக்கும். கை பத்திரம்.
3. சுடு நீரில் இருக்கும் தேயிலை பை சாயம் நீரில் ஊறிக்கொண்டிருக்கும் வேளையில், அடுத்த குவளையில் பாலை 1 நிமிடத்திற்கு வைத்து சூடாக்கி எடுத்து கொள்ளுங்கள்.
4. ஏற்கனவே சூடாக்கி தேயிலை சாயத்தில், பாலையும், சீனியையும் கலந்து கொண்டால் பால் தேத்தண்ணி ஆயத்தமாகிவிடும்.

குளம்பி

தேவையான பொருட்கள்:

மைக்ரோவேவ் சேப் குவளை 1
கொபி
சீனி
பால்

செய்முறை:

1. குவளையில் பாலை விட்டு 1 நிமிடத்திற்கு மைக்ரோவேவில் சூடாக்குங்கள்.
2. மைக்ரோவேவில் இருந்து கவனமாக எடுத்து, கொபி தூளையும், சீனியையும் போட்டு கலக்குங்கள். கொபி ஆயத்தம் ஆகிவிடும்.

அவசர தேநீர்

தேவையான பொருட்கள்:

மைக்ரோவேவ் சேப் குவளை
தேயிலை பை
பால்
சீனி

செய்முறை:

1. குவளையில் நீரையும், தேயிலை பையையும் போட்டு 1 நிமிடத்திற்கு வையுங்கள். [2 நிமிடத்தில் அதிகம் கொதித்துவிடும். கொஞ்சம் சூடாக வேண்டும் என்பவர்கள் 1 1/5 நிமிடத்திற்கு வைக்கலாம்]
2. மைக்ரோவேவில் இருந்து கவனமாக எடுங்கள். குவளை சூடாக இருக்கும் என்பதை அடிக்கடி சொல்ல முடியாது. நீங்களா யோசிச்சு உங்க கைகளை பாதுகாத்து கொள்ளுங்க.
3. சூடாக இருக்கும் சாய்த்தில் பாலை ஊற்றுங்கள். அதோடு சீனியை உங்களுக்கு தேவையான அளவு போட்டு குடியுங்கள்.

பி.கு:
1. தேயிலை பையை வெளியே எடுக்க வேண்டாமா என உங்கள் மனதில் தோன்றினால் நீங்கள் ஒரு கிச்சன் கில்லாடி.
2. இறுதியாக தந்துள்ள செய்முறையில் தேநீர் சூடாக இருக்காது.[ஆனால் அதை தான் ரொம்ப பேர் விழுந்து விழுந்து குடிக்கிறாங்கப்பா]
3. இதெல்லாம் பெரிய வேலையா? எங்களுக்கு தெரியாதா என கேட்காதிங்க...சுடுதண்ணி வைக்க தெரியாம ரொம்ப பேர் இருக்காங்க..கிகிகிகி

குளம்பி = Coffee
சீனி = Sugar

மைக்ரோவேவ் ஒவன் உங்க கிட்ட இருக்கா?

2009-01-06T13:51:00.001+10:30

தற்போது எம் சமையல்கட்டில் முக்கியமான இடத்தை பிடிப்பது மைக்ரோவேவ் ஒவன்கள் தான். பல நேரங்களில் சுவையான உணவுகளை குறுகிய நேரத்தில் சமைப்பதற்கு மிகவும் உதவியாக இருப்பதை நாம் ஒத்து கொண்டே ஆக வேண்டும். இப்படி சமைக்கும் நேரத்திலும், மற்ற நேரங்களிலும் நாம் பாதுகாப்பாக இருப்பதும், நாம் சமைத்த உணவு ஆரோக்கியமாக இருப்பதும் முக்கியம். அதற்காக பின்வரும் வழிமுறைகளை கையாள்வது அவசியமாகின்றது:

1. மைக்ரோவேவில் வைத்து சமைக்க கூடிய பாத்திரங்களை வாங்கி கொள்வது.
2. சமைக்கும் போது பாத்திரம் மூடி இருக்க வேண்டும். அப்போது தான் சூடு சமமாக பரவி தேவையற்ற பக்றீரியாக்களை கொல்லும்.
3. பைகளில் இருக்கும் உணவுகளை அப்படியே சமைப்பது நல்லதல்ல. (ப்ளாஸ்டிக் பைகள்/ போர்ம் பாத்திரங்கள்)
4. சமைத்த பின்னர் வெளியே எடுக்கும் போது, பாதுகாப்பாக gloves மூலம் எடுங்கள். பாத்திரங்கள் மிகவும் சூடாக இருக்கும்.
5. நீர் வகைகளை சூடாக்கும் போது கவனமாக எடுங்கள். அதிகம் சூடாகிவிடக்கூடிய வாய்ப்புகள் அதிகம்.
6. ஒவனில் எதுவும் வைக்காமல் ஒவனை போடாதீர்கள்.
7. சின்ன குழந்தைகள் கைகளுக்கும் எட்டும் இடத்தில் வைக்காதீர்கள்.
8. எண்ணெயில் பொரித்தெடுப்பதை ஒவனில் செய்யாதீர்கள்.
9. சமைக்க வேண்டிய உணவை சமமாக அடுக்கிய பின்னர் சமையுங்கள்.
10. ஒவனை எப்போதும் சுத்தமாக வைத்திருக்க வேண்டும்.

kitchen test

2009-01-06T12:57:00.001+10:30

oh
my
god
this
is
so
hsfhalghfiaksgfik

இன்னமும் தமிழ்மணத்தில் என் பொம்மை வரவில்லை :(

எள்ளு + உருண்டை= எள்ளுருண்டை

2009-01-05T11:26:00.006+10:30

எங்க ஊர்ல எள்ளுருண்டை மிகவும் பிரபலம். ஊர் கதையை கொஞ்சம் நிறுத்திவிட்டு புலம்பெயர் நாடுகளில் பார்க்கலாமே. எந்த ஒரு ஈழத்து கடைக்கு சென்றாலும் அங்கு எள்ளுருண்டை இல்லாமல் போகாது. இன்று தனது பிறந்த நாளை கொண்டாடும் அன்பு சகோதரன் ஆயில்யனுக்காக இந்த இனிப்பு /பதிவு:

தேவையான பொருட்கள்

எள் 1/4 கிலோகிராம்
சீனி 1/4 கிலோகிராம்
மாஜரின் 2 தே.க
அப்ப சோடா 2 சிட்டிகை

செய்முறை:
1. எள்ளை பொன்னிறமாக வறுத்து எடுத்து கொள்ள வேண்டும்.
2. எள் ஆறி கொண்டிருக்கும் வேளையில் ஒரு தட்டிற்கு மாஜரின் பூசி வைத்து கொள்ள வேண்டும். [தட்டில் கொட்டி வெட்டுவதாக இருந்தால்.]
3. அடுத்து ஒரு சட்டியில் சீனியை போட்டு இடைவிடாது வறுக்க ஆரம்பியுங்கள்.
4. சிறிது நேரத்தில் சீனி முழுவதும் இளகி பாகாக வரும். அப்போது அதனுள் 1 தே.க மாஜரீன், அப்பச்சோடா ஆகியவற்றை போட்டு நன்றாக கலந்து கொள்ள வேண்டும்.
5. பின்பு சீனி பாகில் எள்ளை சிறிது சிறிதாக தூவி நன்றாக கிளறியெடுக்கவும். சீனி பாகு சமனாக போட்ட எள்ளில் இருக்க வேண்டும்.
6. உடனடியாக அடுப்பில் இருந்து இறக்கி, சின்ன உருண்டைகளாக பிடித்து கொள்ளுங்கள். உருண்டைக்கு பதிலாக, மாஜரின் பூசிய தட்டில் கொட்டி அமத்தி, துண்டுகளாக வெட்டயெடுக்கலாம்.

சீனி = Sugar

பி.கு:
1. உருண்டை பிடிக்கும் போது கொஞ்சம் மாஜரினை தொட்டு பிடித்தல் கையில் ஒட்டாமல் இருக்கும்.

2. உருண்டையை உங்களுக்கு வேண்டிய அளவில் பிடிக்கலாம்.

நாம் விரும்புவது நமக்கு கேடு

2009-01-04T20:27:00.003+10:30

பொதுவாகவே எம்மிடம் ஒரு கெட்ட பழக்கம் உண்டு. அதாவது தினமும் முறையே ஆரோக்கியமாக சாப்பிட வேண்டிய காலை,மதிய,இரவு உணவை உண்பதை தவிர்ப்பது அல்லது நேரம் தவறி சாப்பிடுவது. ஆனால் நொறுக்கு தீனி என்றால் குளிர்சாதனப்பெட்டியில் அது இருந்த சுவடே இல்லாமல் ஆகும் வரை தொடர்ந்து சாப்பிடுவது. இதில் கவனிக்க வேண்டிய விடயம் என்னவென்றால் இவை உடலுக்கு நல்லதல்ல என்பது எமக்கு தெரிந்தும் உண்பது தான். அப்படி எம்மை மயக்கிய சில தீனிகளில் பின்வருவன அடங்கும்:

சொக்கிளட்
குளிர்களி (ஐஸ்கிரீம்)
பொரித்தவை (சிப்ஸ்)
மைக்ரோவேவில் வைத்த சோளம் (பொப் கோர்ன்)
டோனட்ஸ்
பேஸ்ற்றீஸ்
பிஸ்கட்ஸ்
இனிப்புகள்
நெய்யில் செய்த பண்டங்கள்

இவை அனைத்தும் நிச்சயம் தவிர்க்க/குறைக்க பட வேண்டியவை. ஆனால் இவை இல்லாமல் வாழ்வதென்பது இலகுவான செயல் இல்லவே இல்லை. ஆனால் இதற்கு மாற்றீடாக சில பண்டங்களை நாம் உண்ணலம். ருசிக்கு ருசியும் ஆச்சு, நம்ம ஆரோக்கியத்தை கெடுக்காமல் இருந்த போலும் ஆச்சு. நாம் பயப்படாமல் உண்ணக்கூடிய சில உணவுகள்:

உப்பு சேர்க்காத நட்ஸ்
கொழுப்பு குறைந்த யோகர்ட்
கரட்/கியூகும்பர்/செலரி போன்றவை hummus dip உடன்
வீட்டில் செய்த கொழுப்பு குறைந்த muffins
பழங்கள்
கொழுப்பு குறைந்த சீஸ் + அரிசி பிஸ்கட்

இதெல்லாம் வேண்டாம்..நான் முதல் லிஸ்டில் உள்ளவற்றை தான் உண்பேன் என அடம்பிடிப்பவரா நீங்கள்?? May God Bless You...

தமிழிஷில் புதிதாய் சமையல் & முதலில் என் சமையல்

2008-12-29T19:53:00.001+10:30

இதுவரை நாளும் திரட்டிகளில் சமையல் பதிவுகளை இணைக்கும் போது எந்த "பகுதியில்" போடுவது என குழப்பம் இருக்கும். தமிழிஷில் இது நாள் வரை "ஹெல்த்" பகுதியில் தான் சமையல் செய்முறைகளை இணைத்து வந்தேன். ஆனால் இப்போது சமையலுக்கு என ஒரு தனி பகுதி அமைத்துள்ளார்கள். குழப்பத்திற்கு தீர்வு கிடைத்துவிட்டது. முதலில் பிரபலமான பதிவு என் பதிவாக இருப்பதையிட்டும் மிக்க மகிழ்ச்சி. தமிழிஷில் சமையல் பகுதியை அறிமுகப்படுத்திய நிர்வாகத்திற்கு நன்றிகள்.

அவசர சாம்பார்

2008-12-28T22:13:00.004+10:30

"தனக்கென்று துணையில்லாது பெட்டையில்லாத தனிப்பேடைக்குயிலாய் கூவித்திரியும்" இப்படித்தான் இந்த குறிப்பை ஆரம்பிக்கலாம்னு இருந்தேன் "வீட்டுக்கு பாரமா சோத்துக்கு தண்டமா, வாங்குற சம்பளத்துக்கு வேலை செய்யாம ப்ளாக்கிங் பண்ணிட்டு இருக்குற" அப்படின்னு பக்கத்துல இருந்த மாரிமுத்து வாசிச்சதால தனக்கு சமைத்து அதன் பின் வேலைக்கும் போகும் அன்பான ஆண்களே நமக்காக ( 9 மணி ஒபிஸ்க்கு 8.45க்கு தான் நான் துயில் முடிப்பதால் என்னைக்காவது சமையல்கட்டு தனியா மாட்டினா மட்டும் நான் செய்வேனாக்கும்) ஒரு அவசர சாம்பார்.

இதுக்கு இன்னா வேணும்னா :

பருப்பு 200 கிராம்

மஞ்சள் 2 தேக்கரண்டி

சீரகம் 1/4 தேக்கரண்டி

வெங்காயாம் 10 ( சின்னது)

பச்சை மிளகாய் 5

தக்காளி 2

ஆச்சா சரி அப்படியே தாளிக்க

எண்ணை 2 தேக்கரண்டி

வெந்தயம் 1/4 தேக்கரண்டி

வத்தல் மிளகாய் 4

கறிவேப்பிலை கொத்தமல்லி ஓசியா வாங்கியிருப்போம்ல ( அண்ணாச்சி கடைன்னா தருவாங்க ரிலையன்ஸ் பிரஸ்ல தரமாட்டங்கதானே ) அதும் வச்சுகிங்க

(உண்மையாலுமே அவசரத்துக்கு சாம்பார் படம் கிடைக்கலை)

ஆ நெக்ஸ்ட் ஆ நெக்ஸ்ட்

ஒரு ஆஃப் எம்.சி பிராண்டி பாட்டில் அளவுக்கு தன்ணிய ( சத்தியமா H2ஓதாங்க ) ஒரு சட்டியில ஊத்தி அதை அடுப்புல வச்சு பத்தவைங்க. ஊர் மேய்ஞ்சு முடிச்சு மறுபடியும் வந்து கொட்டிக்கனும்ன்னு எண்ணம் இருந்தா இன்னோரு குவாட்டர் அளவுக்கு தண்ணி ஊத்திகுங்க.

அப்படியே அதுல அந்த பருப்பை ( என்ன பருப்புன்னே சொல்லலைதானே எது பிடிக்குமோ அது ஆனா பாசி பருப்பு நல்லாருக்கும் ) போட்டு கொதிக்க ஆரம்பிச்சவுடன் மத்த அனைத்டு அயிட்டங்களையும் தாளிக்க எடுத்து வச்சதை தவிர்த்து கொட்டி முடிவிடவும். அப்படியே பக்கத்து அடுப்பை பத்தவைச்சு தாளிக்கிற கரண்டிய காய வச்சு அதுல எண்ணைய ஊத்துங்க அப்புறம் என்ன மத்ததையும் கொட்டி தாளிச்சு கொதிச்சுகிட்டு இருக்கிற சாம்பார்ல ஊத்தி இறக்குங்க. சூடு சோறுக்கு நல்லாருக்கும் தன்ணிய குறைச்சு வச்ச சப்பாத்திக்கும் சூப்பராய் இருக்கும்

திருமணம் ஆகாதவர்கள் கவனிக்க: நெடுக்காலபோவானின் உடாங் சம்பல்

2008-12-23T23:05:00.005+10:30

யார் இந்த நெடுக்காலபோவான் என நீங்கள் கேட்கலாம். காரணம் வலைப்பூவில் நெடுக்ஸ் எழுதுவதில்லை. அவரின் நண்பர் குருவிகளது வலைப்பூவில் சமயங்களில் வருவதோடு சரி. நெடுக்காலபோவான் என்னுடைய யாழ்.கொம் சகோதரர். சிலநாட்களின் முன்னர் உடாங் சம்பல் செய்முறை எழுதிய போது தான் செய்யும் முறையை எனக்கு சொன்னார். உடனே எழுதி தர முடியுமா என கேட்டேன். காரணம் நெடுக்ஸ் புலம்பெயர் நாட்டில் படித்து கொண்டிருப்பவர். தானே சமைப்பவர். திருமணமாகாதவர். காலை நேரங்களில் இலகுவாக உணவு தேவையை பூர்த்தி செய்ய உதவுகின்றது என சொன்னார். நெடுக்ஸை போலவே எத்தனையோ பேர் இருப்பீர்கள். உங்களுக்கு அவரின் செய்முறை உதவட்டுமே:

---------------------------------------------------------------------------------

என்ர உடாங் சம்பல் கொஞ்சம் வித்தியாசமானது. நீண்ட நாளைக்கு என்று தயாரிப்பதால் செய்முறைகளை மாற்றி அமைத்திருக்கிறேன்..!

நீங்கள் செய்ய வேண்டியது...

தேவையான பொருட்கள்.

வறுத்த மிளகாய்த்தூள்

வெங்காயம் சிறியது அல்லது பெரியது (தேவையான அளவு)

பச்சை மிளகாய் ஒரு சில.

பூடு (சில)

இஞ்சி சிறுதுண்டு (நறுக்கியது)

தேங்காய் துருவல் (உலர்த்தியது/ உலர்த்தாது. வசதிக்கு ஏற்ப பயன்படுத்தலாம்) -ஒரு கப் (றைஸ் குக்கரோடு வரும் சிறிய அளவிலான கப் (மிகச் சிறியதல்ல)

மாசிக் கருவாடு தூளாக்கியது. அல்லது இறால் கருவாடு தூளாக்கியது ( சைவ ஆக்கள் இதைத் தவிர்க்கலாம்) - விரும்பிய அளவு.

செய்முறை.

சுத்தமான பொரி பானில் சிறிதளவு சன்பிளவர் ஒயிலை இட்டு சூடாக்கிய பின்.. கடுகு.. பெருஞ்சீரகம்.. கொண்ட கலவையில் ஒரு தேக்கரண்டி இட்டு தாழிக்கவும். அதன் பின்னர் சிறிதாக நறுக்கிய வெங்காயம்.. பச்சைமிளகாய்.. பூடு.. இஞ்சி எல்லாவற்றையும் போட்டு வதக்கி எடுக்கவும்.(கறிவேப்பிலை போட விரும்புபவர்கள் சிறிதாக அரிந்த கறிவேப்பிலையும் போட்டு வதக்கலாம்)

அதன் பின்னர் இரண்டு மேசைக்கரண்டி மிளகாய்த் தூளை சேர்த்து வறுக்கவும். அத்தோடு பொடியாக்கிய கருவாடு அல்லது இறால் போட்டு சில நிமிடங்கள் வறுத்து எடுத்த பின்.. தேங்காய் துருவலைக் கொட்டி வறுக்கவும். தேவையான உப்பும் சேர்த்துக் கொள்ளவும்.

சில நிமிடங்கள் வறுக்க.. எல்லாம் பொன்னிறமாகி.. வரும். அப்போது இறக்கி விடவும்.

ஆற வைத்த பின்.. போத்தலில் அடைத்து வைத்து உணவோடு சாப்பிடலாம். சாப்பிடும் போது தேசிப்புளி சேர்க்கலாம். விரும்பியவர்கள். அவசியம் என்றில்லை. செய்யும் போதே சிறிதளவு வினிகர் விட்டால் அதுவும் தேவையில்லை..!)

(அதிகம் எண்ணை விட்டால் குழையும். உலர்த்தாத தேங்காய் துருவல் வைத்திருந்தால் அதை தனியே உலர்த்தி எடுக்கவும்)

(செய்முறையின் போது தேவையென்றால்.. எண்ணெயின் அளவைக் குறைத்து (தாழிக்க எண்ணெய் அவசியம்) கொஞ்சம் தண்ணீர் கலந்து சற்று அவிய விட்டும் வறுத்தெடுக்கலாம். தேசிப்புளி விட்டும் இறக்கலாம். சாப்பிட முதல் விடுவது எனது வழமை.காரணம் சூடாக்கும் போது சில விற்றமின்கள் எளிதில் ஆவியாகி விடக்கூடியவை.)

------------------------------------------------------------------------------------------------------------------------------------------------------------------

நான் கேட்ட உடனேயே செய்முறை எழுதி தந்த நெடுக்ஸுக்கு நன்றிகள். நீங்களும் உங்களுக்கு தெரிந்ததையும் பகிர்ந்து கொள்ளுங்களேன்...

சஞ்சய்க்கு எச்சரிக்கை: உடாங் சம்பல்

2008-12-23T18:36:00.009+10:30

சென்ற பதிவில் நண்பர் சஞ்சய் "உடாங் சம்பல்" என்றால் என்ன என்ன கேட்டிருந்தார்? அது வெறும் உணவல்ல..எனக்கு ஒரு பிரம்மாஸ்திரம் என்பதை இப்பதிவின் மூலம் சொல்லிக்கொள்கின்றேன். யாழ்.கொம்மில் என்னை அறிந்தவர்களிடம் இதை பற்றி அறிந்து கொள்ளலாம். தவிர கூகிளில் உடாங் சம்பல் என தமிழில் அடித்து பாருங்கள், எனக்கும் உடாங் சம்பலுக்குமான உறவு தெரியும். இனி செய்முறைக்கு போகலாம். இரண்டு வருடங்களுக்கு முன்னர் எழுதியதை ஒரு சில மாற்றங்களுடம் மறுபடி தருகின்றேன்.

உடாங் என்றால் மலே மொழியில் "இறால்" என்று பொருள்படும்.இந்த சம்பலை செய்ய பலமுறைகள் உள்ளன.இது மிக சுலபமான ஒரு முறை. உறைப்பு/காரம் அதிகம் பிடிக்காதவர்கள் செத்தல் மிளகாயை குறைத்து போடுங்கள்.

தேவையான பொருட்கள்:

300 இறால் (பெரியது)
3 - 4 மே.க தேங்காய் எண்ணெய்

அரைத்தெடுக்க:
5 செத்தல் மிளகாய் (நீரில் 5 நிமிடங்களுக்கு ஊறவையுங்க)
2 சிகப்பு மிளகாய்
4 வெங்காய தடல்
2 உள்ளி பல்லு (வெள்ளை பூண்டு)
2 கான்டில் நட் (இருந்தா போடுங்க, இல்லை என்றால் அவசியமில்லை)
1/2 தேசிக்காய்/எலுமிச்சை

தூவுவதற்கு:
1/2 மேசைகரண்டி சீனி
1/4 மேசைகரண்டி சிக்கின் ஸ்டொக் தூள்
உப்பு தேவைக்கு ஏற்ப போடுங்க

செய்முறை:

1. ஒரு சட்டியில் எண்ணெயை விட்டு சிறிது சூடாக்கவும். [உங்களுக்கு இதை படிக்கும் போது, 'அடுப்பில் வைக்க வேண்டாமா? / அடுப்பை பற்ற வைக்க வேண்டாமா?' என சந்தேகம் எழுந்தால், எதிர்காலத்தில் நல்ல ஒரு சமையல்காரராக வருவதற்கான அறிகுறியே தான். கவலை வேண்டாம்]

2. சூடாக்கிய எண்ணெயில் அரைத்த பொருட்களை போடு நன்றாக பச்சை மணம் போகும் வரை வறுத்துக் கொள்ளுங்கள்.

3. பச்சை மணம் போனதும் அதில் இறாலை போட்டு 7-10 நிமிடங்களுக்கு வேக வைக்க வேண்டும். உங்கள் விருப்பத்திற்கேற்ப அவித்தெடுங்கள். காரணம் சிலருக்கு பாதி அவிந்தால் போதும், சிலருக்கு முற்றிலும் அவிந்திருக்க வேண்டும்.

4. நன்றாக அவிந்து வந்ததும் அதில் தேசிக்காய் சாறையும் , சீனி, உப்பு & சிக்கின் ஸ்டொக் தூளையும் போட்டு கிளறவும். சோய் சோஸ் சேர்த்தால் சுவை அதிகமாகும்.

5. 1 நிமிடத்தில் அடுப்பை விட்டு இறக்கவும். இறக்கிய பின்னர் பொரித்த வெங்காயம், ஸ்பிரிங் ஒனியன் மேலே தூவி பரிமாறலாம்.

பி.கு: வெள்ளை சாதத்துடன் சாப்பிட மிகவும் சுவையாக இருக்கும். சப்பாத்தி கூடவும் சாப்பிடலாம். தப்பில்லை.

தங்க பூசணிக்காய் சமைச்சிருக்கேன்

2008-12-22T19:21:00.005+10:30

சில வருடங்களாக நண்பர்கள்/உறவுகளாகிவிட்டோமே எப்போதும் தொந்தரவு குடுப்பது நியாயம் இல்லை என நினைத்து சில வாரங்களாக செய்முறைகள் எழுதுவதை தவிர்த்து வந்தேன். ஆனால் விதி வலியது என்பது எனக்கு சில நாட்களாக புரிகின்றது. காரணம் தொடர்ந்து என்னை சமையல் செய்முறைகளை எழுத சொல்லி வரும் கருத்துக்களும், மின்னஞ்சல்களுமே. இனிமேல் உங்களை கடவுள் தான் காப்பாற்ற வேண்டும் என சொல்லியபடியே மறுபடி சமையல்கட்டிற்குள் போகின்றேன்.

புதிதாக சமையல்கட்டிற்குள் நுழைந்திருக்கும் அன்பு அண்ணன் ஜோசப் பால்ராஜுக்காக ஒரு செய்முறை. [இந்த வாய்ப்பை விட்டால் ஜோண்ணா சமைக்க ஆரம்பித்திருப்பதை எப்படி தான் உலகிற்கு சொல்வது! கிகிகி] இச்செய்முறை விரைவில் செய்யக்கூடியது மட்டுமில்லாது உடலிற்கும் சத்துள்ள ஒரு உணவு.

250கிராம் பூசணிக்காய்
1 பெரிய வெங்காயம்
3 பச்சை மிளகாய்
1 கெட்டு கறிவேப்பிலை
1/2தே.க கடுகு
1/2தே.க பெரிய சீரகம்
தேவையான அளவு உப்பு சேர்த்துக்குங்கன்னு அடிக்கடி சொல்ல முடியாது. புரியுதா?! கிகிகிகி

1. பூசணிக்காயை சிறு துண்டுகளாக வெட்டி,சுத்தம் செய்து, நீரில் கழுவி எடுங்கள்.
2. சிறிதளவு நீரில் உப்பு போட்டு பூசணிக்காயை அவித்தெடுங்கள். ரொம்ப அவிக்க வேண்டாம். இதை மைக்ரோஅவனில் வைத்து கூட எடுக்கலாம். அது உங்க இஸ்டம்.
3. ஒரு சட்டியில் எண்ணெய் ஊற்றி சூடாக்கவும். சூடானதும் அதில் கடுகு, சீரகம், வெங்காயம், மிளகாய், கறிவேப்பிலை போன்றவற்றை முறையே போட்டு தாளியுங்கள்.
4. தாளித்து முடிந்ததும், அதில் ஏற்கனவே அவித்து வைத்துள்ள பூசணிக்காயை போட்டு கிளறி 2 நிமிடத்தில் அடுப்பில் இருந்து இறக்குங்கள்.

கறி ஆயத்தமாகிவிட்டது!
இதில் உறைப்பை/காரத்தை தருவது பச்சை மிளகாய் தான். நீங்கள் காரப்பிரியர் எனில் பூசணிக்காயுடனேயே மிளகாயையும் போட்டு அவிக்கலாம். தப்பேயில்லை. சாமி குற்றம் ஆகிவிடாது.

அதென்ன தங்க பூசணி என கேட்கின்றிங்களா? [கேட்கலைன்னா கூட நான் சொல்லி தான் தீருவேன்] இது எங்க வீட்டில் காய்த்த பூசணிக்காயில் செய்தது. அதனால் தான் அது 'தங்க' பூசணிக்காய். பூசணிக்காய் என்றால் நினைவுக்கு வருவது ஹலொவீன் தானே? இனி அதை விட பயம் தரும் என் செய்முறை உங்கள் நினைவுக்கு வரட்டுமே! [இனிமேல் யாராச்சும் என்னை செய்முறை போட சொல்லி கேட்பீர்களா?கிகிகி]

பூசணிக்காய் பற்றிய தகவல்களுக்கு நாடவேண்டிய முகவரி: தங்கபூசணி ரசியம்

சொந்த சமையல்: Prawn & Corn Hot Rice

2008-10-17T22:17:00.006+10:30

முதன் முதலில் சமையல் செய்யும் போது, வீட்டில் அம்மா செய்வதை நினைவில் வைத்து தான் செய்வோம். பின்னர் பொதுவான/இலகுவான சில சமையல்களை செய்வோம். பின்னர் சிலர் செய்முறைகளை பார்த்து செய்வார்கள். சிலர் சமையல்கட்டில் உள்ள பொருட்களை நினைத்தபடி போட்டு செய்வார்கள். சமையல் சுவவயாக வருகின்றதா இல்லையா என கேட்க கூடாது. அதன் பின்னர் ஓரளவு சமையலில் நாங்கெல்லாம் பெரிய ஆட்களாக்கும் எனும் நிலை வந்த பின்னர், புதிதாக நாமே செய்ய ஆரம்பிப்போம். ஏதோ நினைவில் இருப்பது இல்லாததையெல்லாம் செய்துவிட்டு அதற்கு ஒரு பெயரை வைத்துவிடணும். அப்போ தான் நம்மையும் பெரிய சமையல்காரங்க என நம்புவார்கள். விபத்தாக ஆரம்பிப்பது சிலது சுவையான பதார்தமாக மாறிவிடுவதும் உண்டு. [எனக்கு இப்படி அடிக்கடி நடக்கும்] அப்படி அண்மையில் நடந்த ஒரு இனிய விபத்து பற்றி தான் இந்த பதிவில் பார்க்க போகின்றோம்.

Fried Rice எனும் உணவில் எனக்கு விருப்பம் அதிகம். செய்வதும் இலகு, சாப்பிடுவதும் இலகு, சுவையும் அதிகம். இப்படி பல காரணங்களுக்காக, பல விதமாக சமைத்ததால் இப்போதெல்லாம் நடு இரவில் எழுப்பி சமைக்க சொன்னாலும் fried rice தான் சமைக்கின்றேன். அப்படியான அனுபவத்தில் நானே உருவாக்கிய ஒரு fried rice தான் இது. இனி செய்முறையை பார்க்கலாமா?

தேவையானவை:
சாதம் - 1 கப்
இறால் - 5
சோளம் - 1/4 கப்
வெங்காயம் நீளவாக்கில் அரிந்தது - 2 மே.க
பீன்ஸ் பேஸ்ட் - 1 மே.க
தக்காளி பேஸ்ட் - 1/2 மே.க
மல்லியிலை - 1/2 மே.க
பச்சை மிளகாய் - 1
எண்ணெய் - 1/2 மே.க
உப்பு தேவையான அளவு.

1. முதலில் சாதம் இருக்கா என பார்க்கவும். அது இல்லை எனில் இதை செய்யவே முடியாது.
2. அடுப்பை பற்ற வைத்து,சட்டியை வைத்து அதில் சோள எண்ணெய்/ தேங்காய் எண்ணெய் விட்டு சிறிது சூடாக்கவும்.
3. எண்ணெய் சூடானதும் இறாலை போட்டு பாதி அவியும் வரை கிளறவும்.
4. இறாலை எடுத்து ஒரு பாத்திரத்தில் போட்டு வைக்கவும்.
5. அதே சட்டியில் வெங்காயத்தையும், மிளகாயையும் போட்டு வதக்கவும். சிறிதளவு வதங்கியதும் அதில் சோளத்தை சேர்க்கவும்.
6. ஒரு நிமிடத்தின் பின்னர் பீன்ஸ் பேஸ்ட் & தக்காளி பேஸ்ட் & உப்பு சேர்த்து கொதிக்க விடவும். [பீன்ஸ் பேஸ்டில் உள்ள காரம் பிரச்சனை பண்ணக்கூடாது இல்லையா]
7. ஒரு நிமிடம் போதுமானதாக இருக்கும். பின்னர் அதிலேயே இறாலை போட்டு இன்னொரு நிமிடம் கொதிக்க விடவும்.
8. இறால் இப்போது அவிந்து வந்திருக்கும். ஏற்கனவே 'இருக்கா/இல்லையா' என சோதித்து பார்த்த சாதத்தை அதில் கொட்டி நன்றாக கிளறி இறக்கவும்.
9. இறக்கி சூடாக இருக்கும் போதே மல்லி இலையை மேலே தூவி விடுங்கள்.
10. சுவையான fried rice ஆயத்தம் ஆகிவிடும்.

Fried Rice என்பதற்கு என்ன தமிழாக்கம்? எரித்த சாதம்? சாதாரணமா சமைத்தாலே பயந்து கொண்டு சாப்பிடுகின்றார்கள். இதில் எரித்த சாதம் என்றால் என சமையல் என்னாவது? அதனால் பெயரை அப்படியே ஆங்கிலத்திலேயே விட்டுவிடலாம் என்ற முடிவுக்கு வந்துள்ளேன். தைரியம் உள்ளவர்கள் முயற்சித்து பாருங்களேன்...

அவள் செய்த அவல்

2008-10-11T12:50:00.008+10:30

நவராத்திரியில் கடலைக்கு [சுண்டல்] எத்தனை முக்கியம் இருக்கோ; அவலுக்கும் உண்டு. 'அவல் கடலை' என்று சேர்த்தே அழைப்பது ஈழத்தில் உள்ள வழக்கம். நவராத்திரி தினங்களில் அவல் நிச்சயம் இருக்கும். ஈழத்தில் காலை நேர உணவாகவும் அவல் ஆவதுண்டு. ஊருக்கு போகும் நேரத்தில் பெரியத்தையின் அவலுக்காகவே காலையில் அவர் வீட்டுக்கு அண்ணன்களுடன் போய்விடுவேன். அத்தனை அற்புதமான சுவை. அப்படி வேறு யாருக்குமே சமைக்க தெரியாது என்பது என் கருத்து. புதிதாக துருவிய தேங்காய் பூவையும், சர்க்கரையையும் சேர்த்தால்...என்ன சுவை..என்ன சுவை...

அவல் செய்வது ஒன்றும் பெரிய வேலையே இல்லை. ஆனாலும் கைப்பக்குவம் என சொல்வார்களே; அது அடிக்கடி வேலையை காட்ட தான் செய்கின்றது.

அவல் - 250 கிராம்
துருவிய தேங்காய் பூ - 50 கிராம்
சர்க்கரை - 50 கிராம்
ஏலக்காய் தூள் - 1/4 தே.க

1. அவலை நீரில் 10 நிமிடங்களுக்கு ஊற போடவும். பின்னர் நன்றாக நீரில் அலசி, நீரை வடிகட்டி ஒரு பாத்திரத்தில் போடவும். [நீர் நன்றாக போயிருக்க வேண்டும்]
2. அப்பாத்திரத்திலேயே மிகுதி பொருட்களை போட்டி, நன்றாக கலந்து எடுக்கவும்.

கவனிக்க வேண்டியவை:
* சர்க்கரை = வெல்லம்
* சர்க்கரையுடம் சிறிதளவு சீனியும் (சர்க்கரை) சேர்க்கலாம்
* ஏலாக்காய் தூளை தவிர்க்கலாம்
* சீனிவியாதி இல்லை எதில் அதிக சர்க்கரை சேர்க்கலாம்.

மிக முக்கிய குறிப்பு 1: படத்திலிருப்பது தான் 'அவள் செய்த அவல்'
மிக முக்கிய குறிப்பு 2: அந்த 'அவள்' நான் தான். கிக்கிக்

என் வீட்டு தோட்ட மிளகாய் செடி

2008-10-11T12:01:00.007+10:30

வீட்டு தோட்டம் என்பது ஒரு அழகான விடயம். அதை அனுபவித்தவர்களுக்கு தான் அதன் அருமை தெரியும். எங்கள் கையால் வைத்த ஒரு செடி துளிர்விட்டு, வளர்ந்து, பூத்து காய்ப்பது என்பது ஒரு குழந்தையை பார்த்து மகிழ்வது போன்ற ஒரு விடயம். தினமும் ஒரு மணி நேரமாவது தோட்டத்தில் இருந்தால் உடல் நலனிற்கும் நல்லது, மனதிற்கும் நல்லது என்பது நான் சொல்லியா உங்களுக்கு புதிதாக தெரிந்திட போகுது!

எனக்கு தோட்டம் தான் நண்பர்கள் போல; தினமும் மாலையில் அங்கு சென்று அவர்களுடன் பேசாவிடில் மனதிற்கு அமைதியாக இருக்காது. மனிதர்களோடு ஏற்படும் கோபதாபங்களையும் அங்கு கொட்டுவதுண்டு.

இப்படி ஒரு சம்பவம் அண்மையில் கூட நடந்தது. வழமை போல் மனிதர்களோடனா கோபம், தோட்டத்திற்கு சென்றேன். மண்வெட்டியை எடுத்து மண்ணை கொத்திவிட்டு சென்று விட்டேன். இதெல்லாம் பெரிய விடயமா என கேட்கலாம். விசயம் என்ன என்றால்; அந்த மண் மிகவும் கடினமானது. முதன் முறையாக அந்த இடத்தை தோட்டம் செய்ய பாவிக்கலாம் என நினைத்திருந்தேன். மண்ணை பதப்படுத்த நிலத்தை முதலில் கொத்த வேண்டியிருந்தது. வீட்டில் முதலில் கொத்திய போது கடினமாக இருந்தது. வேலைக்கு ஆள் வைத்து செய்யலாம் என முடிவெடுத்திருந்தோம். அந்த நிலத்தை தான் நான் கொத்தியிருந்தேன்! இதில் ஒரு சுவாரசியமான விசயம் என்னவென்றால் மண்ணோடு சேர்த்து என் காலையும் நான் கொத்தி வைத்திருந்தது தான். மாமா என் காலை பார்க்கும் வரை நான் கவனிக்கவும் இல்லை; எனக்கு வலிக்கவும் இல்லை. மாமா சொன்னவுடன் இரத்ததை பார்த்து மயக்கம் வராத குறை தான். அதன் பின்னர் நான் ஊரையே கூட்டி அழுது ஆர்ப்பாட்டம் பண்ணியதை சொல்லணுமா என்ன!

இதற்கு எங்க வீட்டில் வந்த பின்னோட்டங்களையும் [அங்கணையுமா? கிகிகி] படிச்சு பாருங்களேன்:

மாமா: "வியர்வை சிந்தி தோட்டம் செய்வது பார்த்திருக்கேன். இப்போ தான் ரத்தம் சிந்தி செய்வதை பார்க்கிறேன்"

பெரியண்ணா: "அடிப்பாவி அந்த மண்வெட்டியையே தூக்க மாட்டாய் என்றிருந்தேன், இவ்வளவு நிலத்தையுமா!"

நண்பர் ஒருவர்: "அது தானே! ரத்தம் பார்க்கலைன்னா தூக்கம் வராதே"

சின்னண்ணா: [லண்டனில் இருப்பவருக்கு படம் எடுத்து அனுப்பியிருக்கார் பெரியண்ணா] "ஆத்தா நீ அவள் தானா?"

நான்: "கிகிகிகிகிகிகிகிகிகிகிகிகி" [இதை தவிர தப்பிக்க வழியிருக்கா என்ன!]

மேற்சொன்ன சம்பவம் ஒரு சின்ன உதாரணம் தான். சந்தோசம் என்றாலும் தோட்டத்தோடு பகிர்வதுண்டு. பரீட்சைக்கு அங்கிருந்தும் படிப்பதால், பரீட்சை முடிவுகளை அவர்களுக்கு சொல்ல வேண்டும் தானே. அதே போல புடவை உடுத்தி எங்காவது செல்லும் போதும் தோட்டத்திற்கு சென்று என் நண்பர்களுக்கு காட்டாமல் போவதில்லை. [அவங்க தானே அழகா இல்லை என சொல்ல மாட்டாங்க]

அண்மையில் சகோதரர் ஜீவனின் மிளகாய்செடி பதிவை படித்தேன். மிகவும் உணர்வு பூர்வகாம எழுதியிருந்தார். ஒரு சின்ன பிள்ளையின் மனது அப்படியே இருந்தது. அன்று நடந்ததிற்கு இன்று ஒன்றுமே செய்ய முடியாது. ஆயினும் நான் என் கையால் வைத்து, வளர்க்கும் ஒருவரை உங்களுக்கு அறிமுகம் செய்கின்றேன்.

இவரோட பெயர் சிவப்புச்சாமி...செல்லமா சிவப்பா. இவரைப்போல தோட்டத்தில் இன்னும் 10 பேர் இருக்கின்றார்கள்.

இவர் ரொம்ப உறைக்கும் இனத்தை சேர்ந்தவர். ஒரு கறி செய்வதற்கு ஒன்று போட்டாலே போதுமாக இருக்கும். கறியை விட stir fry செய்யும் போது போட்டேன் நன்றாக இருந்தது. உங்க வீட்டு மிளகாய் செடி பற்றியும் சொல்லுங்களேன்..

இன்று சமையல்கட்டில் "Cool as a Cucumber"

2008-10-09T11:42:00.006+10:30

ஊருக்கு சென்றால் மாங்காய், நெல்லிக்காய், புளியங்காய், விளாங்காய் என மிளகாய்தூள்+ உப்புடன் சாப்பிட்டதற்கு; ஒஸ்திரேலியா திரும்பினால் பெரும் சோதனையாக இருக்கும். மாங்காய் மட்டும் சில மாதங்களில் கிடைக்கும். மற்றவை மருந்திற்கும் பார்த்ததில்லை. ஆனால், இதற்கெல்லாம் கவலைப்படுவமா நாங்க? இவற்றிற்கான மாற்றாக Cucumber, Apple, Celary, Carrot, Orange ஆகியவற்றை உண்பதுண்டு. இவை உணவில் சாதாரணமாக சேர்ப்பதுண்டு என்றாலும் உப்புதூளுடன் சாப்பிட்டு பாருங்களேன். அப்படியொரு சுவை. இவற்றுள் எனக்கு மிகவும் பிடித்தது Cucumber. Cucumber + மிளகாய் தூள் + மிளகுதூள் + உப்பு சேர்த்தால்....ஆஹா...

Cucumber வெள்ளரிக்காய் இனத்தை சேர்ந்தது என பார்த்தாலே தெரியும். அதனால் இனி "வெள்ளரிக்காய்" என்றே அழைக்கலாம். [நாங்கெல்லாம் தமிழில் தான் பேசுவோமாக்கும்] பூசணிகொடி போலவே வெள்ளரிக்கொடியும் வளரும். பெரிய இலைகளை கொண்டிருக்கும். இதை பச்சையாகவோ/ ஊறுகாய் போட்டோ சாப்பிடலாம். வெள்ளரிக்காய் கோடை காலங்களில் சாப்பிட சிறந்தது. இதில் நீரும், வைட்டமின் சீ அதிகமாக உள்ளது.

நன்றி

வெள்ளரிக்காயை வெட்ட முதல், நீரில் நன்றாக கழுவ வேண்டும். சிலருக்கு உள்ளிருக்கும் விதைகளை நீக்கியபின்னர் சாப்பிட விருப்பம் இருக்கும். அதற்கு காயை இரண்டாக வெட்டி, ஒரு கரண்டியால் வழித்தெடுக்கலாம். வெள்ளரிக்காயை சலட் வகைகளில் பயப்படாமல் சேர்க்கலாம். சுவை வேண்டும் எனில் அதிகமாக உறைப்பும், புளியில் சேருங்கள்.

குறிப்பு: முதலாவதாக இருக்கும் படத்தில் வெள்ளரிக்காயுடன் உப்பு, தேசிக்காய் சாறு, Paprika தூள் சேர்த்துள்ளேன்.

நேற்று துர்க்கை சாப்பிட்டது

2008-10-02T17:37:00.004+09:30

மறக்காமல் ஒரு படம் எடுத்து வைத்து விட்டு சாப்பிடுங்கள் என சொன்னேன் என்பதற்காக வேண்டா வெறுப்பாக எங்க வீட்டில் ஒரு ஜீவன் தன் கைதொலை பேசியில் எடுத்த படம்.
நேற்றற துர்க்கை பூஜையில் இரண்டாம் நாள், சுண்டல் செய்தேன். முதல் நாள் பால், பழத்தோடு ஆரம்பித்தது. அதை தொடர்ந்தால் இருக்கும் வீரமும் போய்விடாதா?கிகிகி

உங்க வீடுகளில் எப்படி?

சென்னைக்கு என்னை வரச்சொல்லும் இருவரின் புகைப்படங்கள்

2008-09-23T22:20:00.003+09:30

இப்படி ஒரு மரம் இங்கு இல்லையே!

முட்டை அவிப்பது எப்படி?

2008-09-15T20:05:00.006+09:30

முட்டை அவிப்பது என்பது ஒரு பெரிய கலை. நம்பினாலும், நம்பாட்டிலும் அது தான் உண்மை. அதிகம் அவித்தாலும் பலனில்லை, சிறுது நேரத்தில் எடுத்தாலும் பச்சைவாடை போகாது. அதிகம் அவிப்பதால் சுவையில் வித்தியாசம் வரப்போவதில்லை. ஆனால் சத்து குறைந்துவிடும். முட்டையை அவித்தோ/பொறித்தோ சாப்பிடலாம். சிலர் அப்படியே பச்சையாகவும் சாப்பிடுவார்கள். அது அனைவருக்கும் பொருந்தாது. தவிர அவித்த முட்டையில் தான் ப்ரோட்டின் சத்தின் தாக்கம் அதிகமாக இருக்கும் என்கிறார்கள்.

ஒரு பாத்திரத்தில் நீரை ஊற்றி, அதில் முட்டையை போட்டு அவிக்க வேண்டும். (முட்டையை குளிர்சாதனப்பெட்டியில் வைத்திருந்தால், அறை வெப்பத்திற்கு வந்த பின்னர் தான் அவிக்க வேண்டும். )நீர் கொதிக்க தொடங்கியதும், அரை அவியலாக வேண்டும் எனில் 3 நிமிடங்களிலும், நன்றாக அவிய வேண்டும் எனில் 9 நிமிடங்களிலும் எடுக்கலாம்.

அரை அவியல் எனில், 3 நிமிடத்தில் வெளியே எடுத்து "egg cup" இல் வைக்கவும். மேலிருக்கும் முட்டை ஓட்டை மெதுவாக உடைத்தெடுக்கவும். அதில் உப்புடன் வேண்டிய தூள்களை சேர்த்து சாப்பிடலாம்.

தூள்கள்:
மிளகுதூள்
மிளகு தூள் + சீரகத்தூள்
மிளகு தூள் + சீரகத்தூள் + பப்பரிக்கா தூள்
சீரகத்தூள் + பப்பரிக்கா தூள் + செத்தல்தூள்

நன்றாக அவித்த முட்டை எனில், 9 நிமிடங்களில் வெளியே எடுத்ததும், வெந்நீரை வெளியே கொட்டிவிட்டு, புதிய நீர் சேருங்கள். 2 நிமிடத்தில் ஓட்டை உடைக்கலாம்.

என் சமையல்கட்டில் வந்த சில முட்டை செய்முறைகள்:

முட்டை பிட்ஸா

முட்டைசம்பல்

அளவோடு உண்டு, ஆரோக்கியமான வாழ்க்கை வாழ்க.

சமையலறையில் காத்திருக்கும் பொறிகள் - பகுதி 2

2008-09-10T16:53:00.007+09:30

சென்றபகுதியில் சமையல் செய்யும் போது, எம்மை எப்படி பாதுகாத்து கொள்ளலாம் என எழுதியிருந்தேன். தற்கொலை, கொலை என சமையல்கட்டிற்குள் வரவே பயமாக இருக்கு, அப்படி சொல்லித்தான் ஆகணுமா என சிலர் அன்பாக கேட்டிருந்தார்கள். எனக்கும் அது சரியென தோன்றியது.(பின்னே இருக்காதா? நம்மள நம்பி சாப்பிடவருபவர்களை பயப்படுத்தினால் ஓடிவிட மாட்டார்களா? அப்புறம் பரிசோதனைக்கு எலிகளுக்கு அலையும் நிலை வந்துவிடாதா!)

இந்த பகுதியில் நாம் சமைக்கும் உணவால் மற்றவர்களுக்கு வரும் ஆபத்துக்கள் பற்றியும், அவற்றை எப்படி தவிர்க்கலாம் என்பது பற்றியும் பார்க்கலாம்.

பொதுவாகவே என்ன தான் மாங்கு மாங்கு என ருசியாக, அழகாக சமைத்தாலும்; அவ்வுணவு சாப்பிடுவதற்கு உகந்தது என சொல்ல முடியாது. உணவுப்பொருட்களை சில வழிகளில் பாதுகாக்கலாம்: சமைத்தல்,சுத்தமாக சமைத்தல்/பாதுகாத்தல்,குளிரான இடத்தில் வைத்து பாதுகாத்தல் & சில பொருட்களை தனிதனியா வைத்து பாதுகாத்தல்.

சமைக்க முன்னர் கவனிக்க வேண்டியவை:
* சமைக்கும் இடம் சுத்தமாக இருக்கின்றதா என பாருங்கள். சிலருடைய சமையல்கட்டிற்கும் குப்பை தொட்டிக்கும் பெரிதாக வித்தியாசம் இருக்காது.
* சமையலோடு ஜக்கியமாகிவிடக்கூடிய நகைகளை அணியாதீர்கள். கொழுக்கட்டை செய்கின்றேன் பேர்வழி என வைர மோதிரத்தை சமைக்காதீர்கள்.

சமைக்கும் போது கவனிக்க வேண்டியவை:
*இறைச்சி,மீன்,காய்கறிகளை வெட்டுவதற்கு ஒரே வெட்டுபலகையையோ/கத்தியையோ பாவிக்காதீர்கள். அசைவத்திற்கு தனியாக, சைவத்திற்கு தனியாக வைத்திருப்பது உடலுக்கு நல்லது.
* ஒரு பொருளை வெட்டிய பின்னர், பலகையையும் கத்தியையும் நன்றாக நீரில் கழுவிய பின்னர் வேறுரு பொருளை வெட்ட பயன்படுத்துங்கள்.
*வித்தியாசமான உணவு பொருட்களை கையாளும் போது, உங்கள் கைகளை நீரில் கழுவி சமையுங்கள்.
* தலைமுடி சாப்பாட்டில் விழாதவாறு பார்த்துக்கொள்ளுங்கள்.
* காய்கறி வெட்டும் போது நகத்தை வெட்டாதீர்கள்.

சமைத்த பின்னர் கவனிக்க வேண்டியவை:
* உணவை மூடி வைக்க வேண்டும். பூச்சியையும் சேர்த்து பரிமாறுவது நமக்கு அழகல்ல.
* சுடசுட உணவுகளை குளுரூட்டியில் வைக்காதீர்கள்.
* குளிர்சாதனப்பெட்டியில் இருந்து எடுக்கும் உணவை சூடாக்கி உண்ட பின், மிகுதி இருப்பின் மறுபடி வைக்காதீர்கள்.

சாப்பிடும் போது கவனிக்க வேண்டியவை:
* சமைத்தது யார் என்பதை கவனிக்க வேண்டும். அவரில் நம்பிக்கை இருந்தால் சாப்பிடுங்கள்.
* அதிகமான சூடான உணவையோ, அதிகம் குளிராக உள்ள உணவையோ உண்ணாதீர்கள்.
* சாப்பிடும் போது உங்களுக்கு தேவையானதை மட்டும் சாப்பிடுங்கள். இருக்குதே என்று அனைத்தையும் போட்டு, பின்னர் மருத்துவரை பார்க்காதீர்கள்.

இத்தனையும் மீறி உங்களுக்கு உணவு ஒத்துக்கவில்லை என்றால், ஏழரைசனியன் உங்க மேல ஏறி நின்று குத்துப்பாட்டுக்கு நடனம் ஆடுறார் என புரிஞ்சுக்குங்க.

எலுமிச்சையின் பலன்கள்

2008-09-03T12:45:00.005+09:30

*படத்தை பெரிதாக்கி பார்க்கவும்

நன்றி

சமையலறையில் காத்திருக்கும் பொறிகள்

2008-09-02T09:55:00.003+09:30

பொதுவாகவே சமையல் என்பது மிகவும் இலகுவான வேலை போலவும், சமைப்பவர்கள் வேலை வெட்டி இல்லாதவர்கள் போன்றதொரு மாயையும் உலாவுகின்றது. இதை சமையல் செய்யும் ஒருவரால் ஒத்துக்கொள்ள முடியாது.

ஒரு வீட்டில்,கிராமத்தில்,நகரத்தின்,நாட்டின் பாரம்பரியத்தையோ/கலாச்சாரத்தையோ அறிந்து கொள்ள சிறந்த இடம் சமையல் தான் என்பது என் கருத்து.

இப்படிப்பட்ட சமையல் என்பது அத்தனை இலகுவான காரியம் அல்ல. ஒரு உணவை சமைக்கும் போது மிகவும் கவனமாக இருக்க வேண்டும். இல்லை எனும் பட்சத்தில் ஒரு தற்கொலையோ,பல கொலைகளோ நிகழ வாய்ப்பு அதிகமாக உள்ளது.

இந்த பதிவில் எப்படி தற்கொலையை தவிர்க்கலாம் என பார்ப்போம். கொலைகள் பற்றி பின்னர் யோசிக்கலாம்.கிகிகிகி

* சமைக்கும் போது சமையலை மட்டும் பார்க்கவும். கவனம் இல்லாவிடில் களத்தில் பலமாக காயம் அடையும் சாத்தியம் அதிகம்.
* காய்கறி வெட்டும் போது வெட்டுப்பலகையை உபயோகிக்கவும்.
* வெதுப்பியை போடும் போது தேவையான சூட்டிற்கு வைத்தல் அவசியம். வெதுப்ப வேண்டியதும் கருகி, கையும் கருகும் வாய்ப்பு அதிகம். (சொந்த அனுபவம்)
* வெதுப்பியில் வேலை செய்யும் போது மறக்காமல் கைகவசம் அணியுங்கள். வேலை முடிந்ததும் வெதுப்பியை மறக்காமல் நிறுத்துங்கள்.
* சமைக்கும் போது நீரை சமையல்கட்டில் கீழே ஊற்றுவதையோ,தெளிப்பதையோ தவிருங்கள். வீணாக காலையோ இடுப்பையோ உடைப்பதில் இருந்து தப்பிக்கலாம்.
* கத்திகளை கண்ட இடத்தில் போட்டு வைக்காதீர்கள். அதற்கென ஒரு இடத்தில் வையுங்கள். முடிந்தால் கத்தி கவசங்களை வாங்கி, மாட்டி வையுங்கள்.
* சமைக்கும் போது முடியை மடித்து கட்டி வையுங்கள். நீளமுடி இருப்பவர்கள் அதிகம் கவனமாக இருக்க வேண்டும்.
* சுடு எண்ணெயில் சமையல் செய்யும் போது, நீண்ட கைபிடி கொண்ட அகப்பைகளை பயன்படுத்துங்கள்.
*சுடு நீரை கையாளும் போது மிகவும் கவனமாக இருங்கள்.
* சமைத்த உடன் எதையும் சுட சுட வாயில் போடாதீர்கள்.

இவற்றையெல்லாம் பின்பற்றி சமையல் செய்யும் தருணத்தில் ஒரு தற்கொலையை தவிர்க்கலாம் என்பது என்னால் உறுதிப்படுத்தப்படுகின்றது. (சொந்த அனுபவம்). அடுத்த பதிவில் எப்படி கொலைகளை தவிர்க்கலாம் என்பதை பார்ப்போம்..
:)

நல்வாழ்வுக்கான உணவு கூம்பகம்/பிரமிட்

2008-09-01T08:44:00.003+09:30

இது ஒரு மனிதன் சுகதேகியாக வாழ்வதற்கு எவ்வாறு தனது உணவுப்பழக்கத்தை அமைத்துக்கொள்ள வேண்டும் என்பதை விளக்குவதற்கான அமைப்பாகும். முக்கோண வடிவிலான அமைப்பில் உள்ளெடுக்கப்படவேண்டிய உணவுகள் பற்றி இப்படம் எளிமையாக விளக்குகிறது.
கீழே அடிப்பரப்பில் உள்ள உணவுகள் அதிக அளவில் உள்ளேடுக்கப்பட வேண்டும் . மேலே செல்ல செல்ல அவை குறைந்த அளவில் உள்ளெடுக்கப்பட வேண்டும்
அண்மையில் சகபதிவர் வி.ஜே.சந்திரன் அவர்களை பற்றி யாழில் எழுதிய போது கிடைத்த ஒரு நல்ல இணைப்பு. சமையல்கட்டிற்கு மிகவும் உபயோகமாக இருக்கும் என நினைத்தேன். எடுத்து வந்துவிட்டேன்.

ரசமாலை ஒரு வித மாலையோ?

2008-08-29T09:52:00.007+09:30

அப்படித்தான் முதன் முதல் கேள்விப்பட்ட போது எனக்கு தோன்றியது. உங்களில் எத்தனை பேருக்கு இந்த இனிப்பு பற்றி தெரிந்திருக்கும் என தெரியவில்லை. இது இந்திய இனிப்பு என்பதால் தமிழ்நாட்டு உறவுகள் பலருக்கு நிச்சயம் தெரிந்திருக்கும். ஈழத்து உறவுகளுக்கு? இறுதியாக அறிந்து கொண்டது நானாக கூட இருக்கலாம். தற்போதைய பிரச்சனை அது அல்ல. பெயரே சரியாக தெரியாத இனிப்பை நான் செய்தது தான் பெரும் பிரச்சனை.

இந்தியாவில் எந்த ஊரில் இருந்து வந்தது என அறிந்து கொள்ள முயன்ற போது கிடைத்த தகவலையும் செய்முறை எனும் சோதனைக்குள் செல்ல மென்னர் பார்க்கலாம்.

Rasmalai originated somewhere in the coastal parts of the Indian states of Orissa, West Bengal and Bihar.

இந்த பதிவை எனது நெடுங்கால யாழ் நண்பர், சகோதரர் திரு.கந்தப்பு அவர்களுக்காக சமர்ப்பிக்கின்றேன். இன்று தனது பிறந்த நாளை கொண்டாடும் கந்தப்பு மகிழ்வான வாழ்வை வாழ வாழ்த்துகின்றேன். என்னுடைய எழுத்துக்களை தொடர்ந்து படித்து, பாராட்டி வருவதோடு நிற்காமல், சில நாட்கள் எழுதாமல் இருக்கும் போது என்னை மிரட்டி எழுத வைக்கும் கந்தப்புவிர்காக இந்த ரசமாலை. 3 வருடங்களாக எனது உடாங் சம்பல் பற்றி புகழ்பாடும் கந்தப்பு இனி ரசமாலை புகழும் பாடுவார் என நம்புகின்றேன். கிகிகிகிகி

இனிமேல் சோதனை...அதாவது செய்முறை:

பால் 1 லீட்டர்
சீனி 500 கி
பன்னீர் 250 கி
குங்குமபூ கொஞ்சமாக
பாதாம் பருப்பு சிறிதாக வெட்டியது 3 தே.க
பிஸ்டாஜ்ஸிஜோஸ் சிறிதாக வெட்டியது 3 தே.க
ஏலக்காய் தூள் 1/2 தே.க

1. ஒரு பாத்திரத்தில் 250 கிராம் சீனியையும்,நீரும் சேர்த்து குறைந்த வெப்பத்தில் கொதிக்க வையுங்க.
2. இன்னோர் பாத்திரத்தில் பாலையும், மீதியிருக்கும் சீனியையும் கலந்து குறைந்த வெப்பத்தில் கொதிக்க வைக்கவும். பால் கொதித்து அரைவாசி ஆகும் வரை அடுப்பில் இருந்து இறக்க வேண்டாம்.
3. பால் பாதியானதும் அதில் ஏலக்காய் பொடி, வெட்டிய பருப்புகள் மற்றும் குங்குமப்பூ சேர்த்து நன்றாக கலக்கி அடுப்பில் இருந்து இறக்குங்க.
4. பன்னீரை எடுத்து சிறு உருண்டைகளாக்கி சற்று அமத்தினால் சரியான வடிவம் கிடைத்துவிடும்.
5. இவ்வுருண்டைகளை கொதித்து கொண்டிருக்கும் சீனியில் போட்டு 10 நிமிடங்களுக்கு அவித்து எடுங்க. அவிக்கும் போது பாத்திரம் மூடியிருக்க வேண்டும்.
6. 10 நிமிடத்தில் பன்னீரை வெளியே எடுத்து வையுங்க. சீனிகரைசல் வடிவதற்கு சிறிது நேரம் குடுங்கள்.
7. ஏற்கனவே கொதிக்க வைத்த பாலில் பன்னீர் உருண்டைகளை போட்டு மேலும் 4-5 நிமிடங்களுக்கு கொதிக்க வையுங்க.
8. 4-5 நிமிடங்களின் பின்னர் அடுப்பில் இருந்து இறக்கி, ஆறவிடுங்க. சிலர் சிறிது சூடாக இருக்கும் போது சாப்பிடுவார்களாம். பெரும்பாலானோர் சூடு ஆறியதும் 5 மணித்தியாலங்களுக்கு குளிர்சாதன பெட்டியில் வைத்த பின்னர் சாப்பிடுவார்களாம். எது எப்படியோ கஸ்டபட்டு செய்ததை சாப்பிட்டால் சரி தான்.

குறிப்புகள்:
1. கொதிக்கும் சீனி கலவைக்கு எப்போதும் மதிப்பு குடுங்க.
2. சீனிகரைசலில் அவித்த பன்னீரே சுவையாக இருக்கும். வீட்டில் அண்ணன், தம்பி இருந்தால் சற்று கவனமாக இருக்கவும். பாலில் போடா முன்னரே பாதி பன்னீரை நான் இழந்துவிட்டேன்.
3. பால், சீனி என பயங்கரமா இருக்கு. அடிக்கடி செய்து சாப்பிடாதிங்க.

இப்படியெல்லாம் அழைக்கலாம்:
ரஸ் மலய்
ரஸ் மலாய்
ரசமலாய்
ரசமாலை

இதெல்லாம் பிடிக்கலை என்றால் உங்களுக்கு பிடிச்ச போல அழைக்கலாம்.தப்பில்லை.கிகி

சமையல்கட்டில் ஆயில்யன்

2008-08-27T18:22:00.003+09:30

தினந்தோறும் சமையல் என்பது டென்ஷனா விசயம்தான் என்பது இங்கு வந்த பிறகு அல்ல இங்கு வந்து சமைக்க தொடங்கிய பிறகே புரிந்துக்கொண்டேன்!

என்ன சமையல் செய்யணும்ன்னு யோசிச்சு,அதுக்கு என்ன சமையல் பொருட்கள் வேணும்ன்னு கண்டுபிடிச்சு அப்புறம் அதையெல்லாம் எப்படி பக்குவமா சேர்த்து சமைக்கணும்ங்கறவிசயங்களெல்லாம் பயங்கரமான அவஸ்தை! ரிசல்ட் நாம நினைச்சதை விட ஓரளவுக்கு சரியாக வந்திருந்துச்சுன்னா அதை விட ஆச்சர்யம் வேற ஒண்ணுமே இல்லை!

இப்படித்தான் சரி வாரத்துல ஒரு நாளாவது சமைச்சுப்பார்ர்போம்ன்னு நேத்து டிரைப்பண்ணின ஐட்டம்தான் வாழைக்காய் கறி !
இதைத்தான் நான் உங்களுக்கு சொல்லி தரப்போறேன் எப்படி செய்யணும்ன்னு

முதல்ல எந்த சமையலும் செய்யறதுக்கு முன்னாடி கம்யூட்டரை ஸ்டார்ட் பண்ணிக்கணும்! அதுல பிறகு கூகுள் சாட் & தமிழ்மணம் பின்னே அறுசுவை எல்லாத்தையும் ஒபன் பண்ணி வைச்சுக்கோங்க!

இப்ப நான் சமையல்ல ஒரு ஐட்டம் செய்ய கோயிங்க்! வாழைக்காய் எடுத்து நல்லா கழுவி அந்த தோலை எல்லாம் எடுத்துட்டு பச்சையாக இருக்கற காயை வெள்ளையாக்கிடுங்க!

அப்புறம் அதை ரவுண்டு ரவுண்டா கட் பண்ணிக்க்கிட்டு கொஞ்சம் சுடுத்தண்ணியில ஊறப்போட்டுட்டு கொஞ்சமா நெருப்புல அடுப்புல வைச்சுட்டு போய் பத்து நிமிஷம் சாட் பண்ணிட்டு அப்புறம் அப்படியே கண்டினியூவா சாட் பண்ணிக்கிட்டே தமிழ்மணம் பார்த்துக்கிட்டு அறுசுவைக்கு போய் அடுத்து என்ன செய்யறதுன்னு கொஞ்சம் நோட் பண்ணிக்கிட்டு ( இது சும்மா ரெபரன்ஸ்க்குத்தான் ஏன்னா சமையல் குறிப்புல சொல்லியிருக்காத ஐட்டங்கள் நமக்கு கிடைக்காத சூழ்நிலையில!)

இப்ப அடுப்புல வாணலி அப்படின்னு எழுத்துக்களில் சொல்லபடற இருப்பு சட்டியை நல்லா சுடவைச்சு கொஞ்சம் கடுகு,கடலைபருப்பு உ.பருப்பு எல்லாத்தையும் போட்டு என்னிய மாதிரி கருகிப்போற மாதிரி வறுக்காம பொன்னிறமா வறுத்து அதுல அப்படியே மிதமா வெந்திருக்கும் வாழைக்காய்களினை எடுத்து ஒண்ணொன்ணா ஒண்ணொன்னா எடுத்து போட்டு லைட்டா எண்ணெய் ஊத்தி கொஞ்சம் மிளகாய்தூள் கொஞ்சம் சீரகத்தூள் கொஞ்சம் மிளகுதூள் போட்டு, தேவையான அளவு உப்பு போட்டு கொஞ்சம் தேங்காய் துருவல்களையும் போட்டு அப்படியே பெரட்டிக்கிட்டே இருக்கணும்! ஒரு 10 - 15 நிமிசத்துக்குள்ள ஐட்டம் ரெடி!

எப்படி சாப்பிடறதுங்கறதையும் சொல்லிக்கொடுத்திடறேனே! வழக்கம்போல சாதம் ரெடி பண்ணிவைச்சுக்கோங்க (கொஞ்சம் கொழைஞ்சி இருந்தா இன்னும் சூப்பர் - பட் எனக்கு சாதமும் கூட கருகிடுது!) அப்புறம் நல்ல கெட்டி தயிர் இருந்தா அதையும் எடுத்து வைச்சுக்கோங்க! ஒரு பாத்திரம் எடுத்து அதுல கொஞ்சம் சாதம் கொஞ்சம் தயிர் இப்படியே ஒரு மூணு லேயர்ல மிக்ஸ் பண்ணி வைச்சுக்கோங்க!

இப்ப எப்படி உக்காந்து சாப்பிடறதுங்கறதையும் சொல்லிடறேன். நல்லா சப்பணமிட்டு தரையில குந்திக்கினும் பின்னாடி ஒரு ஆறு அடி இடம் சைடுல ஒரு நாலு அடி இடம் இரண்டு பக்கமும் விட்டு வைச்சுக்கிட்டு சாதம் இருக்கற பாத்திரத்தையும் வாழைக்காய் கறி இருக்கற பாத்திரத்தையும் எடுத்து வைச்சுக்கிட்டு நல்லா ருசிச்சு ருசிச்சு சாப்பிடுங்க!

ஆனந்தமா இருக்கும்!!!!!

என்ன சாப்பிட்டு முடிச்சாச்சா? சரி அப்படியே கை கழுவிட்டு யாரையும் எதையும் டிஸ்டர்ப் பண்ணாம அப்படியே மல்லாந்துக்கோங்க!
சூப்பர் தூக்கம் ஒண்ணு போட்டு முடிச்சுட்டு பிறகு எந்திரிங்க நான் அப்புறமா வரேன் பை!

----------------------------------------------------------------------

நான் கேட்டதும், உடனே செய்முறை எழுதி தருகின்றேன் என சொன்னதோடு நிற்காமல், அதை செய்த ஆயில்யனுக்கு நன்றிகள். எழுத்தில் மட்டுமல்ல, தான் சமையலிலும் ஒரு புலி என நிரூபித்தவரை முடிந்தவரை பாராட்டவும். (கலாய்க்கவும் என நான் சொல்லவில்லை)

மாங்காய் + உப்பு + மிளகாய்தூள்

2008-08-26T20:29:00.004+09:30

என்ன ஒரு சுவையான உணவு!!! இப்ப சாப்பிட்டு கொண்டே தான் இந்த பதிவு எழுதுறேன். ஊருக்கு சென்ற போது உருப்படியாக நான் பழகி கொண்ட ஒரே ஒரு பழக்கம் இது தான். (கிகிகி) ஊரில் என்றால் அண்ணாக்களோடு சேர்ந்து மரங்களில் ஏறியே சாப்பிட்டுள்ளேன். (எனக்கு ஏற தெரியாது என்பது உண்மை தான். ஒத்துக்கிறேன். ஆனால் அண்ணன்கள் இருந்தால் மலையேறலாமோ தெரியாது. ஆனால் நிச்சயம் மாமரம் ஏறலாம்) இப்படி தான் ஒரு கையில் என்னிடல் ஒரு சின்ன சட்டியில் உப்பு+தூளை குடுத்துவிட்டு, என்னை மேலே ஏற்றி கொண்டிருந்தார்கள். நான் கீழே நின்ற அண்ணன் கண்ணில் தூளை கொட்டி .....அது ஒரு கொடூரமான சம்பவம்..கிகிகிகி

மாங்காயை அப்படியே சாப்பிட்டாலும் சுவை. அதையே வெட்டி மாங்காய் சம்பல் போட்டு சாப்பிட்டாலும் சுவை. அதிகம் சாப்பிட்ட பின்னர் அண்ணன்களுக்கு வீட்டில் திட்டு வாங்கி குடுத்தால் சுவையோ சுவை.

அண்மையில் சென்னையில் கூட மாங்காய் சாப்பிட்டு திட்டு வாங்கிய இனிப்பான அனுபவம் எனக்கு உண்டு. தவிர தஞ்சாவூரில் புளியம்பழம் மரத்திலேயே பறித்து, (நான் இல்லை, நான் கேட்டேன் என கார் ஓட்டிய அண்ணா தான் மரத்திலிருந்து ஒரு பெரிய கொப்பையே பறித்து தந்தார்.) பக்கத்திலிருந்த என் நண்பன் செந்தி மிகவும் கவனமாக வைத்திருந்த உப்பை பிடுங்கி சாப்பிட்ட அனுபவமும் உண்டு. மிளகாய் தூள் கிடைக்கவில்லை. ஆனாலும் உப்போடு சமாளித்தோமே!!

நெல்லிக்காயும் ஊரில் சாப்பிட்ட அனுபவம் உண்டு. சென்னையில் பார்க்கவில்லை. அது தான் எனக்கு கவலை..இவை தவிர: அன்னாசி, குயுகும்பர், அம்பரலங்காய், கரட், அப்பிள், கொய்யாக்காய் போன்றவற்றுக்கு கூட உப்பும் தூளும் சேர்த்து சாப்பிட்டு திட்டு வாங்கியுள்ளேன். கிகிகிகி

சமையல்கட்டில் செய்முறை சொல்லாவிடில் என் ஜென்மன் எப்படி சாபல்யம் அடையும்:

மாங்காய் சம்பல்

எங்கள் வாழ்வில் சின்ன வயசில் அம்மா சமைத்த சாப்பாட்டை விட இதை தானே அதிகம் சாப்பிட்டு இருக்கிறம்...

தேவையானது:

மாங்காய்
மிளகாய் தூள்
உப்பு
வெங்காயம் (நான் யாரையும் திட்டவில்லை)
மிளகாய் (நிறைய போட்டு போட்டு பிறகு....என்னை குறை சொல்ல வேண்டாம்)

1. மாங்காயை சின்னனா வெட்டுங்க.
2. வெங்காயம், மிளகாயை சின்னதா வெட்டுங்க
3. மேலே குறிப்பிட்ட அனைத்தையும் ஒன்றாக போட்டு கலக்கவும்.
4. மற்றவர்களுக்கும் குடுத்து சாப்பிடவும்.

பி.கு - களவெடுத்த மாங்காய்க்கு ருசி அதிகமாம்..ஆனால் காவல்துறையில் இருந்து உங்களை வெளியே எடுக்க நாங்கள் வரமாட்டோம்.

படம்: குருவிபபா (சரியாக 2 1/2 வருடங்களுக்கு முன்னர் தந்த படம்)

நரி தூக்கிட்டு போன உளுந்து வடை

2008-08-21T13:07:00.008+09:30

எம்மில் சின்ன வயதில் இந்த கதையை கேட்காதவர்கள் இருப்பார்கள் என எனக்கு தோன்றவில்லை. அத்தனை பிரபலம். அதிலும் வீட்டில் எனக்கு இந்த கதையை சொன்ன போது, "நரி ஏன் காக்காவை பாட சொல்லி கேட்குது, கீழ இருந்து ஒரு துவக்கால சுட வேண்டியது தானே" என கூறி காகங்களின் முழு சாபத்திற்கும் ஆளகியிருக்கேன். அதை வைத்து இன்று வரை என்னை கலாய்ப்போர் எண்ணிக்கையும் குறையவேயில்லை.

உளுந்துவடை பார்ப்பதற்கு சாதரணமாக இருக்கலாம். நினைத்த நேரத்தில் சாப்பிடும் அளவிற்கு கிடைக்க கூடிய ஒரு உணவு பதார்த்தமாக இருக்கலாம். ஆனால் மாவை எடுத்து அதற்கு இப்படி ஒரு உருவம் குடுப்பதென்பது எளிதான காரியம் இல்லை. நான் 10-15 மா உருண்டைகளை பாழடித்து தான் படத்தில் இருக்கும் நிலைக்கு மாவை கொண்டு வர பழகி கொண்டேன்.

தேவையான பொருட்கள்:

உளுந்து - 1 கப்
வெந்தயம் - 2 மே.க
வெங்காயம் - 2
மிளகாய் - 2
பெரும் சீரகம் - 1/2 மே.க
கறிவேப்பிலை - 2 மே.க
உப்பு - தேவைக்கேற்ப

செய்முறை:

1. உளுந்தையும், வெந்தயத்தையும் நீரில் போட்டு 5-8 மணித்தியாலங்களுக்கு ஊற வைக்கவும். பின்னர் நன்றாக மென்மையாக வரும் வரை அரைத்தெடுக்கவும்.

2. வெங்காயம், மிளகாய், கறிவேப்பிலையை சிறிதாக அரிந்து, அரைத்த மாவுடன் சேர்த்து நன்றாக கலக்கவும். இப்போ மறக்காமல் பெரும்சீரகத்தையும் சேர்க்க வேண்டும்.

3. இந்த கலவையில் தேவைக்கு ஏற்ப உப்பையும் மறக்காமல் சேருங்கள். இல்லை என்றால்

4. எண்ணெயை சூடாக்கி, மாவை போட்டு பொன்னிறமாகும் வரை பொரித்தெடுக்கவும். வடை போடும் முறை - தேசிக்காய் அளவு மாவை எடுத்து, வட்டமாக உருட்டவும். உள்ளங்கையில் அந்த உருண்டையை வைத்து கொஞ்சம் தட்டையாக்கி, ஒரு கைவிரலால் சிறிய ஓட்டையை நடுவில் போடவும்.

கவனத்தில் எடுக்க வேண்டியது: உருட்டிய மாவை மட்டும் சுடு எண்ணெயில் போடவும். உங்க கையை நீங்களே பத்திரமாக வைத்து கொள்ளுங்கள். எண்ணெயில் எறியாதீர்கள். எண்ணெய் உங்கள் மேல் தெறித்துவிடும்.

கள் + கப்பா + மீன்கறி

2008-08-14T20:12:00.003+09:30

எங்க ஊரில் மரவள்ளிகிழங்கை அவித்து, அதில் தேங்காய் பூ, செத்தல், கறிவேப்பிலை, உள்ளி போட்டு உரலில் இடித்து எடுப்பார்கள். அதன் சுவையை விஞ்ச வானுலகத்தில் கூட ஒரு அமிர்தம் கிடையாது. என்ன இந்த அமிர்தம் பயங்கரமான உறைப்பாக இருக்கும். கண்ணில் நீர் வரும் வரை செய்துவிடும் சக்தி இதற்குண்டு. அதிலும் தோட்டத்திலிருந்து எடுக்கப்பட்ட (திருடப்பட்டால் இன்னும் சிறப்பு என என் அண்ணன் ஒருவர் சொல்லி தந்தார்) மரவள்ளி கிழைங்கை அவித்து, இடித்தால்...அப்பப்பா... (என்ன இங்கு திருடுவதற்கு கிழங்கு தோட்டம் தான் கண்ணில் தென்படவேயில்லை)

அதே போல கேரளத்தில் மிகவும் பிரபலமாக உணவு கப்பாவும் மீன்கறியும் தானாம். (இதை கானாஸ் உறுதி செய்வார் என நம்புவோம்). வீதியோர கடையாகட்டும், படகு வீடாகட்டும், நட்சத்திர விடுதியாகட்டும் கப்பா இல்லாத இடம் கிடையாதாம். அதிலும் சிறப்பாக கள்ளு குடிப்பவர்களுக்கு சிறப்பாக செய்து கொடுப்பார்களாம். அனுபவம் உள்ளவர்கள், தங்கள் அனுபவங்களை பகிர்ந்து கொள்ளுங்கள். முந்தைய பதிவில் குறிப்பிட்டது போல, நண்பர் தீபக் குடுத்த செய்முறையை பரீட்சித்ததன் பலன் தான் இந்த பதிவு. இனி செய்முறைக்கு போகலாம்.

கப்பாவிற்கு தேவையானவை:
மரவள்ளிகிழங்கு 500 கிராம்
மஞ்சள்தூள் 1/2 தே.க
கறிவேப்பிலை 2 கெட்டு
பச்சைமிளகாய் 3
தேங்காய்பூ 1/4 கப்
வெங்காயம் 1 (சிறியது)
செத்தல்மிளகாய் 2
கடுகு 1/2 தே.க

கப்பா எப்படி செய்வது:
1. கிழங்கை சிறுதுண்டுகளாக வெட்டி, நீரில் அவிக்க வேண்டும். அவிக்கும் போது நீரில் உப்பையும், மஞ்சளையும் சேர்க்க வேண்டும். எப்போதும் ஒற்றுமையா இருப்பது தான் அழகு. பிரிப்பது ஆகாது. அதனால் அவிக்கும் போதே மஞ்சளை சேர்த்திடுங்க.
2. கிழங்கு நன்றாக அவிந்ததும், அடுப்பில் இருந்து இறக்க வேண்டும். இறக்கிய பின்னர், நீரை வடித்தெடுங்கள்.
3. மிளகாய், தேங்காய், வெங்காயத்தை நன்றாக அரைத்தெடுங்கள்.
4. ஒரு சட்டியில் அரைத்த விழுதையும், கிழங்கையும் போட்டு மசித்தெடுக்க வேண்டும்.
5. இன்னொரு சட்டியில் எண்ணெயை சூடாக்கி, கடுகு, செத்தல்மிளகாய், கறிவேப்பிலையை தாளித்து மசித்த கிழங்குடன் சேர்த்தால் கப்பா ஆயத்தமாகிவிடும்.

கப்பாவுடன் சாப்பிடுவதற்கு சிறந்தது மீன்கறி தான். அது தான் சமையல்கட்டில் ஏற்கனவே வைத்தாகிவிட்டதே. சும்மா சொல்ல கூடாது ஜோடி பொருத்தம் அமோகம் தான் போங்க. கப்பாவிற்கும், மீன்கறிக்கும் செய்முறை தந்திட்டால் போதுமா, கள்ளுக்கு எங்கே போவது என கேட்கபடாது. இப்பவே சொல்லிட்டேன். கள் என்றதும் இந்த பக்கம் வந்தவர்களுக்கு நான் சொல்ல விரும்புவது என்னவென்றால் "தண்ணி குடியுங்க...குடிதண்ணி குடியுங்க. உடலிற்கும் உங்க குடும்பத்திற்கும் ரொம்ப நல்லது" கிகிகிகி

சொல்லமறந்தது: கப்பா என்றால் மரவள்ளிகிழங்காம்

வரலாற்று முக்கியத்துவம் வாய்ந்த போன்டா

2008-08-09T19:29:00.009+09:30

போன்டா என்பது ஒரு வரலாற்று முக்கியத்துவம் வாய்ந்த சிற்றுண்டி. இந்த வசனத்தை எப்படி இத்தனை உறுதியாக சொல்கின்றேன் என கேட்பவர்களுக்காக:
1. சின்ன வயதில் பள்ளியில் போன்டா சாப்பிடாதவர்கள் உண்டோ (குறிப்பாக ஆண்கள்). அதிலும் வகுப்பு வேலையில் போய் வாங்க, அதை ஒரு ஆசிரியர் பார்க்க. அப்புறம் என்ன, கன்னத்துக்கு வெளியிலும் போன்டா, உள்ளும் போன்டா.
2. ஏன் சொல்கின்றார்கள் என்றே புரியவில்லை. ஆனால் வலைப்பூ மக்கள் ஒன்றுகூடலில் இவ்வுணவு பற்றி பேசுகின்றார்களாமே!
3. லக்கிண்ணா கூட போன்டா செய்முறை எழுதியிருக்கின்றார் என்றால் பார்த்து கொள்ளுங்களேன்!! (இதை விட ஒரு காரணம் வேண்டுமா)
4. ரிஷானுக்கும் போன்டாவிற்கும் இடையே ஒரு கதையே இருக்காமே! அதை சகோதரரே சொல்வார்.
5. நான் போன்டா செய்முறை எழுதுவது (சோதனை மேல் சோதனை)

தேவையான பொருட்கள்:

கிழங்கு கறிக்கு:
உருளை கிழங்கு - 5
வெங்காயம் - 1
பச்சை மிளகாய் - 3
கறிவேப்பிலை - 3 கட்டு
இஞ்சி அரைத்தது - 1 தே.க
மஞ்சள் தூள் - 1/2 தே.க
சீரக தூள் - 1/2 தே.க
கடுகு - 1/2 தே.க
தேசிக்காய் புளி- 1 தே.க
உப்பு - தேவையான அளவு

மேல் மாவுக்கு:
கடலை மா - 3/4 கப்
அரிசி மா - 1/4 கப்
மிளகாய் தூள - 1 தே.க
அப்ப சோடா - ஒரு சிட்டிகை
உப்பு - தேவையான அளவு

செய்ய வேண்டியவை:
1. உருளை கிழங்கை சுத்தம் செய்து, அவித்து, மசித்து வைத்து கொள்ளவும். அவிக்கும் போது சிறிதளவு மஞ்சள் தூளும், உப்பும் சேர்க்க மறக்க வேண்டாம்.
2. வெங்காயம், கறிவேப்பிலை மற்றும் பச்சை மிளகாயை சிறிதாக அரிந்தெடுத்து வைத்து கொள்ளவும்.
3. ஒரு சட்டியில் சிறிதளவு எண்ணெயை சூடாக்கி, அதில் கடுகை போட்டு வெடிக்க விடவும். (உங்கள் மேல் அல்ல) (யாராச்சும் கோவமா இருந்தா அவங்க மேல கூட போட்டு வெடிக்குதா என பார்க்கலாம்)
4. கடுகு வெடித்ததும் பச்சை மிளகாய், இஞ்சி, கறிவேப்பிலை, வெங்காயம் என ஒன்றின் பின் ஒன்றை சேர்த்து நன்றாக வதக்கவும்.
5. வெங்காயம் வதங்கிய பின்னர் மஞ்சள் தூள் & சீரக தூளை சேர்த்து பச்சை வாசம் போகும் வரை வதக்கவும்.
6. மசித்து வைத்திருக்கும் உருளை கிழங்கு கலவையை வதக்கியவற்றோடு போட்டு கலக்கி, தேசிக்காய் புளி சேர்த்து அடுப்பில் இருந்து இறக்கிவிடுங்கள்.
7. சிறிது சூடு ஆறியதும், உங்களுக்கு விருப்பமான அளவில் உருண்டைகளாக பிடித்து வைக்காவும். உருண்டையாக தான் இருக்க வேண்டும் என சட்டம் இல்லை. அதனால் எந்த வடிவத்திலும் பிடிக்கலாம்.
8. இப்போ ஒரு சட்டியில் எண்ணெயை சூடாக்க விடணும். அதிகம் சூடானால் ஆபத்து உங்களுக்கும், போன்டாவிற்கும். ஆகையால் மெதுவான சூட்டில் வைக்கவும்.
9. எண்ணெய் சூடாகும் நேரத்தில், கலவைக்கு தேவையான அனைத்து பொருட்களையு ஒன்றாக ஒரு சட்டியில் இடவும். நீரை சிறிது சிறிதாக் சேர்த்து இறுக்கமான ஒரு கலவையாக கொண்டுவரவும்.
10. உருட்டி வைத்திருக்கும் கறியை, மா கலவையில் இட்டு பின்னர் எண்ணெயில் போட்டு பொன்னிறமாகும் வரை பொரித்து எடுக்கவும்.

குறிப்பு:
*போன்டாவை மட்டும் பொரிக்கவும். சூடான எண்ணெயை தூர நின்று பார்த்தால் போதும். கைபிடி நீளமான அகப்பையால் பொரிக்கவும்.
* சுட சுட வாயில் போட்டு சுட்டபழம் ஆக வேண்டாம்.

வன்மையாக கண்டிக்கின்றேன்:
* உன் போன்டாவை பார்த்து தான், எறியும் கை குண்டுகளை கண்டுபிடித்தார்களா என கேட்க போகும் என் பங்கு "லெனினையும்"
&
* இதில் கொஞ்சம் அனுப்ப முடியுமா, வீடு கட்ட வேண்டும் என கேட்க போகும் கானாஸையும் "கானாபிரபா"

நேத்து வச்ச கேரள மீன் குழம்பு

2008-08-01T19:04:00.006+09:30

பழைய சாதமும் பழைய மீன் குழம்பும் சாப்பிடுற சுகம் வேறு எதற்கு வரும் என்ற வரிகள் அடிக்கடி என் காதில் விழும். அட அப்படி அதில் என்ன தான் இருக்கு என முயற்சித்து பார்த்தேன். சும்மா சொல்ல கூடாது, சுவையோ சுவைதான் போங்க. (இருக்காத பின்ன, மீனை வெட்டி,சுத்தம் பண்ணுறது நாங்க தானே என வீட்டில் மாமா முணுமுணுப்பதையெல்லாம் சொல்லிட்டா இருக்க முடியும்)

என்னுடைய நெடுநாள் வலைப்பூ நண்பர் தீபக் கேரளா மாநிலத்தை சேர்ந்தவர். சமையலில் என் ஆர்வம் பார்த்து, கேரள சமையல் குறிப்புகள் பலவற்றை தந்துள்ளார். அவற்றிலிருந்து சிலவற்றை முயற்சித்து பார்த்து வருகின்றேன். (இந்த மாதம், கேரளா உணவு மாதம்) அதில் முதல் முயற்சி தான் இந்த கேரள மீன் குழம்பு. எங்களுடைய மீன் குழம்போடு ஒப்பிட்டு பார்க்கும் போது, சுவை கொஞ்சம் வித்தியாசமாக இருந்தது. வீட்டில் அனைவரும் விரும்பி உண்டனர். (இப்படி சொன்னால் தானே நீங்களும் யான் பெற்ற இன்பத்தை பெறுவீர்கள்)

தேவையானவை:
கறிமீன் - 1/2 கிலோ
வினாகிரி - கொஞ்சமா
தேங்காய் எண்ணெய் - 2 மே.க
கடுகு - 1/2 tsp
கறிவேப்பிலை - 20 இலைகள்
வெங்காயம் - 1
இஞ்சி- 1" துண்டு
உள்ளி - 6
பச்சைமிளகாய் - 2
மிளகாய் தூள் - 1 மே.க
மல்லி தூள் - 2 மே.க
மஞ்சள் தூள் - 1/2 தே.க
வெந்தயம் - 1/2 தே.க
புளி கரைசல் - 1/2 தே.க
தக்காளி - 1
உப்பு தேவையான அளவு

செய்ய வேண்டியது:
1. ஒரு பாத்திரத்தில் நீரை எடுத்து, அதில் வினாகிரியையும் 1/2கப் உப்பையும் சேர்க்கவும். அதில் மீனை 15 நிமிடங்கள் வரை ஊறவைக்கவும். பின்னர் வெளியே எடுத்து சிறு துண்டுகளாக வெட்டி எடுக்கவும்.
2. இன்னொரு சட்டியை அடுப்பில் வைத்து, அதில் எண்ணெய் போட்டு கொத்திததும், அதில் கடுகை போடவும், தொடர்ந்து கறிவேப்பிலை, இஞ்சி, உள்ளியை சேர்த்து பச்சை வாசம் போகும் வரை வதக்கவும்.
3. அடுத்து வெங்காயத்தை போட்டு பொன்னிறமாகும் வரை வதக்கவும். தொடர்ந்து தக்காளியை சேர்த்து வதக்கவும்.
4. தக்காளி வதங்கி வந்ததும் மேற்கூறிய தூள்களை சேர்த்து தூள் வாசம் போகும் வரை கிளறவும்.
5. கலவையில் நீர், புளிகரைசல், உப்பை சேர்த்து கொதி நிலைக்கு (சாப்பிடுபவர்களை அல்ல) கொண்டுவரவும்.
6. கலவை கொதித்ததும் அதில் மீன் துண்டுகளை போட்டு 2 நிமிடங்கள் வரை மெதுவான சூட்டில் வைக்கவும்.
7. இன்னோர் சட்டியில் சிறிதளவு எண்ணெயை சூடாக்கி, அதில் வெந்தயத்தை போட்டு தாளிக்கவும்.
8. தாளித்த வெந்தயத்தை குழம்பில் சேர்த்து கிளறவும். மேலும் 10-15 நிமிடங்களுக்கு மெதுவான சூட்டில் வைத்து இறக்கினால் சுவையான கேரளாமீன் குழம்பு ஆயத்தமாகிவிடும்.

அதை உடனே சாப்பிட்டால் = சாதாரண கேரள மீன் குழம்பு
அடுத்த நாள் சாப்பிட்டால் = பதிவின் தலைப்பை பாருங்கப்பா

நீங்க சுத்தமான சமையல்காரரா? எப்படி அறிவது?

2008-07-31T19:19:00.004+09:30

படம்

வீட்டில் உள்ளவர்களையும், பதிவுகலகத்தில் உள்ளவர்களையும் பயப்படுத்த என்றே பல செய்முறைகளை தொடர்ந்து சமைத்து, வலைப்பூவில் எழுதி வருகின்றேன் என்பது ஒன்றும் பெரிய பிரம்ம ரகசியம் இல்லை. எப்பவும் செய்முறையே போட்டால் சுவாரசியமாக இருக்காதே. ஒரு மாற்றத்திற்கு உங்களை வேறு சில வழிகளிலும் பயப்படுத்தலாம் என யோசித்திருக்கின்றேன். அதன் முதல் படியாக, நீங்கள் சுத்தமான சமையல்காரரா என எப்படி கண்டு பிடிப்பது என பார்க்கலாம்.

கீழ் வருபவற்றுக்கு ஆம் இல்லை என பதில் அளிக்கவும்.

1. பெரிய சமையல்காரர் போல படம் காட்டி சமைத்த பின்னர் உடனடியாக உபயோகித்த சமையல் பாத்திரங்களை நீரில் கழுவி வைக்கின்றீர்களா?
2. சமையலில் குளிக்காமல் இருக்க ஏப்ரன் பயன்படுத்துகின்றீர்களா?
3. கேக் போன்றவற்றை செய்யும் போது, சட்டியில் மீதி இருக்கும் கலவையை விரலால் தொட்டு உண்பீர்களா?
4. முக்கியமா சமைக்க ஆரம்பிக்க முன்னர் கைகளை நன்றாக கழுவுகின்றீர்களா?
5. காய்கறி வெட்டும் பலகையை அடிக்கடி நீரில் கழுவுகின்றீரளா?
6. காய்கறிகளை சுத்தம் பண்ணிய பின்னர் வெட்டுகின்றீர்களா?

பதில்கள்:
6-5 ஆம் சொல்லியிருப்பின் = சுத்தமோ சுத்தம் போங்க
4-5 ஆம் சொல்லியிருப்பின் = ம்ஹிம் பரவாயில்ல
3-4 ஆம் சொல்லியிருப்பின் = சரி பொழச்சு போங்க
2-3 ஆம் சொல்லியிருப்பின் = ம்ம் ஹிம் இது வேலைக்கு ஆகாது
1-2 ஆம் சொல்லியிருப்பின் = திருந்துங்கய்யா திருந்துங்க
0-1 ஆம் சொல்லியிருப்பின் = பக்கத்தில இருக்கிற மருத்துவமனை எதுங்க?

தயிர் சேமியா

2008-07-20T16:39:00.003+09:30

தமிழ்சமையல் வலைப்பூ திரட்டிக்கான அடுத்த தயிர் பதிவு
எழுதியவர்: வரவனையான்

கோவை அன்னபூர்னா உணவகத்தில் ஒருமுறை தயிர் சாதம் கேட்ட பொழுது தயிர் சாதம் இன்னும் ஆகவில்லை தயிர் சேமியா இருக்கு என்றனர். முதல் முறையாய் அப்போதுதான் கேள்விப்பட்டேன் அப்படி ஒரு உணவின் பெயரை. வரவழைத்து சாப்பிட்ட போது அதன் சுவை மிகவும் பிடித்து போய்விட்டது. அந்த கொங்கு நாட்டு உணவின் செய்முறை இதோ:

வறுத்த சேமியா ( roasted vermicelli ) - 200 கிராம்,
தயிர் - 1/2 லிட்,
கடுகு - தாளிக்க
வத்தல் மிளகாய் - 4 அல்லது 5
துவரம் பருப்பு- தாளிக்க ,
மஞ்சள்தூள் - ஒரு தேனீர்க்கரண்டி
உப்பு - தேவையான அளவு.

செய்முறை
மஞ்சள்தூள் போட்டு சேமியாவை வேக வைத்து தனியே எடுத்து வைத்து கொள்ளவும். வாணலியில் கொஞ்சம் எண்ணைய் விட்டு துவரம்பருப்பையும் கடுகையும், வத்தலுடன் சேர்த்து தாளித்து ஆறிய சேமியாவுடன் சேர்த்து கிளறவும். பின்னர் தயிரை ஊற்றி பதமாக கிளறவும். சுவையான தயிர் சேமியா சாப்பிட ஆயுத்தமாகிவிட்டது. அதன் மேல் உலர் பழங்கள் தூவி பரிமாறாலாம்.

படஇணைப்பு

தயிர் சலட்

2008-07-20T12:33:00.005+09:30

களமுனையில் படுகாயம் அடைந்த என்னை சுகம் விசாரித்த உறவுகளுக்கு நன்றிகள். "யப்பா கொஞ்ச நாளைக்கு நிம்மதி" என நினைத்தவர்களுக்கு நான் சொல்வது என்னவென்றால் "இப்ப என்ன பண்ணுவிங்க, இப்பா என்ன பண்ணுவிங்க?" கிகிகிகி

இனி சமையல் பக்கம் போகலாம்: தமிழ்சமையல் வலைப்பூ திரட்டி பற்றி இங்கு பேச ஆரம்பித்தோம். வெறும் பேச்சோடு போய்விடாமல், அதற்கு உருவம் குடுத்துள்ளோம். இதுவரை ஆறு உறுப்பினர்களை உள்ளடக்கி அட்டகாசமாக ஆரம்பித்திருக்கின்றோம். இதுவரை ஊக்கம் தந்தவர்களுக்கு மிக்க நன்றி.

அங்கு அறிமுகப்படுத்தப்பட்ட வாரதிட்டம் 1 தயிருக்கான எனது செய்முறை. களத்தில் காயம் அடைந்திருப்பதால் சுலபமான ஒரு செய்முறையை இந்த வாரம் எழுதுகின்றேன்.

தேவையானவை
தயிர் 1/2 கப்
வெள்ளரிக்காய் 1
வெங்காயம் 1
கரட் 1
மிளகு தூள் 3/4 தே.க
உப்பு தேவைக்கேற்ப
கொத்தமல்லி

செய்ய வேண்டியது:
1. வெள்ளரிக்காயையும், வெங்காயத்தையும் சுத்தம் செய்து, சிறிதாக அரிந்தெடுக்கவும். (கை கவனம், ஏற்கனவே என் வீரத்தழும்பு கண்டு எதிரி படை கொக்கரிக்கின்றது.) கரட்டை துருவி எடுத்து வைக்கவும்.
2. ஒரு பாத்திரத்தில் தயிர், மிளகு தூள், உப்பை சேர்த்து நன்றாக கலக்கவும். (அடிக்க வேண்டாம், தயிர் நீர்ப்பதமாகிவிடும்)
3. அதில் வெட்டிய வெள்ளரிக்காயையும், வெங்காயத்தையும் சேர்க்கவும். இந்த நேரத்தில் சிறிதளவு அரிந்த கொத்தமல்லி இலைகளையும் சேர்த்து கலக்கினால் தயிர் சலட் ஆயத்தமாகிவிடும்.

சமையல்கட்டு வீராங்கணைக்கு காயம்

2008-07-16T11:33:00.004+09:30

வணக்கம் வலையுலகம். இது தூயா, தூயாவின் சமையல்கட்டில் இருந்து. இன்றைய தலைப்பு செய்திகள்.வீராங்கணை தூயா நேற்று அவருக்கு எதிராக தொடுக்கப்பட்ட Banana Cake சமரில் படுகாயம் அடைந்துள்ளார். இதன் காரணமாக சில காலங்களுக்கு போர்களத்திலிருந்து ஓய்வெடுக்குமாறு அனுப்பப்பட்டுள்ளார்.

இனி விரிவான செய்திகள்: நேற்றைய தினம் காலநிலை சற்றே குளிர்மையுடன் காணப்பட்டதால், வாழைப்பழ வெதுப்பிக்கு சரியான நேரம் என ஆய்வாளர்களால் சொல்லப்பட்டது. இதை தொடர்ந்து வீராங்கணை தூயாவும் வெற்றிகரமாக வெதுப்பி கலவையை செய்து வெதுப்பி யந்திரத்தில் வைத்திருக்கின்றார். அதன் பின்னர் தான் துயரமான சம்பவம் நடந்திருக்கின்றது. வெதுப்பி யந்திரத்திலிருந்து எடுக்கும் நேரத்தில் கள முனையில் தூயா படு காயம் அடைந்துள்ளார்.

இது பற்றி தூயா கூறியது: "என்னுடைய சமையல் வாழ்வில் நேற்று ஒரு பெரும் துன்பமான, துயரமான நாள்.

இது பற்றி தூயாவின் மாமா கூறியது: "சமையல் கிமையல் என்று போனா, கால வெட்டி போடுவன்"

ஒரு வீராங்கணைக்கு இந்த முடிவா என சகவீரர்கள், வீராங்கணைகள் கடும் சினம் கொண்டுள்ளனர். இருப்பினும் எதற்கும் மனம் தளராத தூயா "இதெல்லாம் சமையல்ல சகஜமப்பா" என கூறியுள்ளார்.

செய்திகள் தொடரும். மீண்டும் களத்து செய்திகளுடன் உங்களை சந்திக்கின்றேன்
;)

தமிழ் சமையல் வலைப்பூ திரட்டி

2008-07-10T15:05:00.002+09:30

வலைப்பூ உறவுகளுக்கு வணக்கம்,

இரண்டு மாதங்களுக்கு முன்னர் நாங்கள் பேசிக்கொண்ட தமிழ் சமையல் வலைப்பூ திரட்டிக்கு ஒரு உருவம் குடுத்துள்ளேன். ஆரம்பமாக மிகவும் அடிப்படையான சில பகுதிகளை மட்டும் உருவாக்கியுள்ளேன். நன்றாக வடிவமைக்க வேண்டும். அதற்கு உங்களோட உதவியும், கருத்துக்களும் தேவை. இதில் இணைய விரும்புபவர்கள் தமிழ் சமையல் வலைப்பூ மின்னஞ்சலுக்கு சிறு மடலிடுங்கள். ஆர்வமுள்ளவர்களை ஆர்வத்துடன் எதிர்பார்க்கின்றேன்.

தமிழ்சமையல் வலைப்பூ திரட்டி
மின்னஞ்சல்

தூயா

என் கேக்கை உடைத்ததுக்கு தண்டனை?

2008-07-10T13:03:00.003+09:30

நான் கஸ்டபட்டு ஒரு கேக் செய்தேன். அதுவும் அந்த ஸ்கலப் போட ரொம்ப நேரம் எடுத்து பண்ணிட்டு, எங்க அண்ணாவையும் மாமாவையும் சரியா இருக்காண்ணு பார்த்து சொல்ல சொன்னேன். அது தான் நான் பண்ணின பெரிய தப்பு.

பாருங்க என் கேக்குக்கு வந்த நிலையை! ஒருத்தர் விரலை வைத்து பார்த்தாராம். அடுத்தவர் கரண்டி பிடியால தட்டி பார்த்தாராம். எங்கே போய் சொல்லி அழ. எல்லாம் விதிங்க விதி...

Coconut Sorbet

2008-07-08T14:28:00.002+09:30

ரொம்ப நாட்களாக சமையல்கட்டிற்கு விடுமுறை விட்டாச்சு. இனிமேலும் விடுமுறை எடுத்தால் சமையல்கட்டிற்கே மரியாதை இல்லாமல் போய்விடுமே. இங்கு எங்களுக்கு நல்ல குளிர். குளிரில் குளிர்களி சாப்பிடுவது தானே எங்களுக்கு மிகவும் பிடித்த விடயம். எப்போதும் குளிர்களி சாப்பிடுவதில் எனக்கு உடன்பாடில்லை. புதிதாக ஏதும் முயற்சிக்கலாமே என நினைக்கும் போது தான் என் அண்ணன் ஒருவர் கற்றுத்தந்த தேங்காய் சோர்பற் நினைவுக்கு வந்தது.
தேவையான பொருட்கள்:

சீனி 1 கப்
தேங்காய் பால் 3/4 கப்
தண்ணி 1 கப்
துருவி காயவைத்த தேங்காய் பூ 1/2 கப்
தேசிக்காய் புளி 1 தே.க
மின்ற் இலை

செய்முறை:
1. ஒரு பாத்திரத்தில் சீனியையும், நீரையும் சேர்த்து கொதிக்க வைக்கவும். சீனி நன்றாக கரைந்து வரும் வரை வைத்தால் போதுமானதாக இருக்கும். சீனி நன்றாக கரைந்த பின்னர் மெதுவான சூட்டில் 5 நிமிடங்களுக்கு சீனிகரைசலை கொதிக்க விடவும்.
2. அடிப்பில் இருந்து இறக்கி, சீனி கரைசலில் தேங்காய் பாலையும், தேங்காய் பூவையும், தேசிக்காய் புளியையும் சேர்த்து கலக்கவும்.
3. ஒரு பாத்திரத்தில் கலவையை ஊற்றி, குளிர்சாதனப்பெட்டியில் வைக்கவும். (Freeze)
4. மூன்று மணித்தியாலங்களின் பின்னர் குளிர்சாதனப்பெட்டியிலிருந்து எடுத்து Food Processor இல் போட்டு நன்றாக அரைக்கவும்.
5. இப்போது, மறுபடியும் அரைத்த கலவையை குளிர்சாதனப்பெட்டியில் இரண்டு மணி நேரத்திற்கு வைத்தெடுக்கவும்.

குறிப்புகள்:
* பரிமாறும் போது மின்ற் இலையை மேலே அழகுக்காக வைக்கலாம். அதோடு தேங்காய் பூவையும் சிறியதளவு மேலே தூவலாம். சாப்பிடும் நினைப்பில் நான் வைக்க மறந்துவிட்டேன்.
* பரிமாற அரைமணித்தியாலத்திற்கு முதல் குளிர்சாதனப்பெட்டியில் இருந்து வெளியே எடுத்து வைக்கவும். பின்னர் சிறிய குவளைகளில் போடலாம்.
* பசுப்பாலில் செய்யப்படும் குளிர்களியை தவிர்க்க விரும்புபவர்கள் இதை சாப்பிடலாம்.

செட்டிநாட்டு இறால் வறுவல்

2008-06-24T21:44:00.005+09:30

தேவையானப் பொருட்கள்

இறால் - 1/4 கிலோ கிராம்
வெங்காயம் - 2 பெரியது ( நறுக்கிக்கொள்ளவும் )
பூண்டு - 10 பெரிய பல்
சோம்பு - ஒரு தேக்கரண்டி
சீரகம் - ஒரு தேக்கரண்டி
தக்காளி - 2 பழம்
தேங்காய் - கால் மூடி ( துருவியது)
உப்பு - 1 தேக்கரண்டி
மஞ்சள் தூள் - 1/2 தேக்கரண்டி
இஞ்சி - ஒரு விரலளவு
எண்ணெய் - 2 தேக்கரண்டி
கறிவேப்பிலை - ஒரு கையளவு
வத்தல் மிளகாய் - 20 பெருசு

பூண்டையும் இஞ்சியையும் நன்கு அரைத்துக்கொள்ளவும் , வெங்காயம் நீளவாக்கில் வெட்டிக்கொளவும்.

தோல்,ஓடு நீக்கிய இறாலை நன்கு சுத்தம் செய்து கொள்ளவும். ( தூயா அளவுக்கு ரொம்ப கழுவினால் இறால் காணாமல் போய்விடும் வாய்ப்புள்ளது :P )

தேங்காய் துருவலையும் 15 வத்தல் மிளகாயையும் சோம்பு,சீரகத்துடன் சேர்த்து அரைத்துக்கொள்ளவும்

வாணலியில் கொஞ்சம் எண்ணை விட்டு வெங்காயம் கொஞ்சம் கறிவேப்பிலை போட்டு நன்கு வதக்கவும். வெங்காயம் பொன்னிறத்துக்கு வந்தபின் தங்காளியை துண்டங்களாக்கி போட்டு வதக்கவும்.

இறாலையும் மஞ்சள்தூளையும் சேர்த்து பிசறி வாணலியில் போட்டு 5 நிமிடம் வதக்கவும். அப்படியே மறக்காமல் கொஞ்சமா தண்ணி ( குடிக்கிறதுதாங்க, அடிக்கிறது இல்லை ;) ) விட்டு அரைத்து வைத்துள்ள பூண்டு இஞ்சி விழுதையும் தேங்காய், வத்தல் கூட்டணியையும் சேர்த்து நீர் வற்றும் வரை கிளறவும்.

இறாலில் மசால் பிடித்தவுடன் தாளிக்கிற கரண்டியில் சிறிது எண்ணைவிட்டு 5 வத்தல் மிளகாயை வெட்டிபோட்டு கொஞ்சம் கறிவேப்பிலை தூவி தாளிக்கவும், தாளித்தபின் அதனை இறக்கி வைத்துள்ள இறால் வறுவலின் மேல் ஊற்றி சிறிது நேரம் கழித்து பறிமாறவும்.

செய்முறை: வரவனையான்

Image: Nene